Vitia jep detaje për masat e reja kundër COVID-19

Ministri i Shëndetësisë, Arben Vitia, ka thënë se nesër (e mërkurë) masat e reja për parandalimin e përhapjes së COVID-19 do t’i propozohen për miratim kabinetit qeveritar.

Vitia tha se shpreson që masat do të marrin aprovimin e Qeverisë.

“Ne qysh nesër do t’i propozojmë Qeverisë së Kosovës që të vendos për ndërmarrjen e disa masave kufizuese të cilat do të prekin disa sektorë të jetës sonë ekonomike e sociale por që janë të domosdoshme. Do të propozojmë që të mbyllen për një kohë klubet e natës, të reduktohet orari dhe aktiviteti i gastronomisë  derisa do të propozojmë një zgjidhje edhe rreth dasmave me disa kufizime, shumë kufizime të reja, për shkak të rezervimeve të mëhershme që i kanë bërë qytetarët”, tha ai.

Vitia tha se arsyeja e masave të reja në këta sektor është sepse shpërndarja më e madhe e virusit është evidente që po vjen nga grumbullimet e mëdha në hapësira të mbyllura dhe mosrespektimi i masave.

Oda e Hotelierisë dhe Turizmit të Kosovës ka bërë të ditur se në takimin e sotëm me ministrin e Shëndetësisë, Arben Vitia, kanë dalë me masa të reja pas rritjes së numrit të të  infektuarve me COVID-19.

Sipas tyre, masat do të  hyjnë në fuqi nga 20 gushti dhe të njëjtat janë: Sallat e dasmave të punojnë deri në orën 22:30 me kapacitet të klientëve 150 të pranishëm; klubet e natës dhe diskotekat mbyllen deri më datë 01.09.2021; të gjithë restorantet ditore, kafiteritë etj. punojnë deri në orën 22:30; nga data 20.08.2021 pa dëshmi vaksinimi apo test PCR nuk lejohen klientët në ambiente hoteliere-gastronomike.

Të martën është shënuar numri rekord i rasteve me COVID-19 që prej fillimit të pandemisë në mars të vitit të kaluar.

Këto pritet të jenë masat e reja të Qeverisë për parandalimin e COVID-19