Sindikata reagon për sulmin ndaj dy zyrtarëve policorë në Viti

Dy zyrtarë policorë dyshohet se u sulmuan nga tre persona të dyshuar të cilët në atë moment ishin duke u arrestuar.

Sipas raportin ditor të policisë, zyrtarët policor gjatë tentimit të arrestimit të tre personave të dyshuar në fshatin Drobesh në Viti, u sulmuan. Dy nga ta përfunduan në pranga ndërsa personi i tretë u largua nga vendi i ngjarjes.

E për këtë situatë ka reaguar edhe Sindikata e Policisë së Kosovës.

Në reagimin e tyre, sindikata thotë se sulmi është i papranueshëm.

“Sindikata i bën thirrje organeve të drejtësisë që të jenë të pakompromis ndaj kujtdo që sulmon zyrtarët policorë gjatë ushtrimit të detyrës. Dhuna ndaj pjesëtarëve të Policisë është e papranueshme dhe kërkon ndëshkim të menjëhershëm”- thuhet në reagim.

Në anën tjetër po e njëjta sindikatë ka apeluar te qytetarët që të respektojnë punën e Policisë, të mos ushtrojnë rezistencë ndaj urdhrave ligjorë të zyrtarëve policorë, pasi një sjellje e tillë përbën vepër penale dhe rrezikon sigurinë publike.

Sindikata ka kërkuar edhe mbështetje për policinë si institucion kyç për sigurinë, rendin dhe zbatimin e ligjit në vend.

“Policia e Kosovës është mburoja e qytetarëve tanë dhe garantuese e rendit kushtetues – prandaj meriton respekt dhe mbështetje të vazhdueshme”- thuhet në reagimin e Sindikatës .

KALLXO.com raportoi në lidhje me ngjarjen që u shënua me 01.08.2025 në fshatin Drobesh në Viti.

Dy policë dyshohet se u sulmuan nga tre persona që i rezistuan arrestimit në Viti