Zyrtari policor duke kontrolluar pamjet nga droni, Foto: KALLXO.com
Siguria në komunikacion, policia ju sheh edhe me dron
Droni është një nga pajisjet të cilën Policia e Kosovës është duke përdorur për të identifikuar kundërvajtësit në komunikacion.
Në kilometrin e 10-të të magjistrales Prishtinë-Podujevë, saktë në fshatin Vranidoll, gjatë ditës së hënë janë vendosur policë të Njësisë Rajonale të Komunikacionit Rrugor të Prishtinës.
Këta policë, nga pamjet e siguruara përmes dronit, po ndalin automjetet që nuk po respektojnë rregullat në trafik.
Këtyre të fundit po iu shqiptohet gjoba të bazuara në Ligjin për Rregullat e Trafikut Rrugor.
Sipas rreshterit të kësaj njësie, Myftar Musliu qëllimi i këtij plani operativ është parandalimi i aksidenteve.
“Me qëllim të parandalimit të aksidenteve në komunikacion rrugor [..], sot jemi duke e shfrytëzuar pajisjen siç është droni, i cili në lartësi bukur të mirë fokusohet në kthesa gjatë rrugës në një segment të caktuar ku shënjestron vijën e plotë”, ka thënë Musliu.
Tutje rreshter Musliu shpjegoi se përmes dronit janë duke u identifikuar ngasësit të cilët më pas po ndalohen për tu gjobitur.
“Pasi të identifikohet ngasësi, i njëjti ndalohet në pikën ku fokusohet njësia dhe vazhdohet me masa të tjera”, ka treguar Musliu.