Pesë raste të dhunës në familje në 24 orët e fundit në Kosovë
Pesë raste të dhunës në familje janë raportuar në Policinë e Kosovës në 24 orët e fundit.
Rastet janë raportuar në Drenas, Gjilan, Mitrovicë dhe dy në Fushë Kosovë.
Në Fushë Kosovë, Policia e Kosovës ka arrestuar një person nën dyshimin se pas një mosmarrëveshje në familje, i njëjti ka rrahur gruan e tij.
Sipas Policisë, viktima ka pranuar tretman mjekësor.
Me vendim të prokurorit, pas intervistimit i dyshuari është dërguar në mbajtje.
Rasti ka ndodhur dje rreth orës 22:00 dhe është në procedurë hetimore.
Një rast tjetër i dhunës në familje ka ndodhur në Fushë Kosovë, ku një grua ka raportuar në Policinë e Kosovës se pas një mosmarrëveshje në familje, dyshohet të jetë sulmuar nga burri i saj.
Sipas Policisë viktima ka pranuar trajtim mjekësor, ndërsa i dyshuari është intervistuar dhe me vendim të prokurorit është arrestuar dhe dërguar në mbajtje.
Rasti ka ndodhur dje rreth orës 17:00.
Ndërkaq në fshatin Qikatovë e Re të Drenasit, Policia e Kosovës njofton se ka arrestuar një person nën dyshimin se i njëjti në gjendje të dehur i ka sulmuar fizikisht gruan dhe të birin e tij.
Viktimat kanë pranuar trajtim mjekësor ndërsa i dyshuari me vendim të prokurorit është dërguar në mbajtje, thuhet në raportin policor.
Rasti ka ndodhur dje rreth orës 13:45 dhe është në procedurë hetimore.
Rast tjetër i dhunës në familje ka ndodhur në Gjilan, ku Policia e Kosovës ka arrestuar një person pasi dyshohet se pas një mosmarrëveshje në familje ka sulmuar fizikisht, gruan dhe vajzën e tij.
Policia njofton se me vendim të prokurorit, i dyshuari pas intervistimit është dërguar në mbajtje.
Rasti ka ndodhur dje rreth orës 15:40.
Në Mitrovicë Policia e Kosovës njofton se ka arrestuar një person, pasi i njëjti dyshohet se ka sulmuar motrën e tij.
Sipas Policisë, i dyshuari pas intervistimit me vendim të prokurorit është dërguar në mbajtje.
Rasti ka ndodhur dje rreth orës 19:00.