Mbahet takimi i tretë i grupit punues për çështjen e targave mes Kosovës dhe Serbisë

Përfaqësuesi Special i Bashkimit Evropian për dialogun Kosovë-Serbi dhe çështje të tjera rajonale të Ballkanit Perëndimor, Mirosllav Lajçak, ka njoftuar se sot në Bruksel është mbajtur takimi i tretë për çështjen e targave mes delegacioneve të ekspertëve të Kosovës dhe Serbisë.

Lajçak ka thënë së ka besim që delegacionet do të gjejnë një zgjidhje të përhershme për të mirën e qytetarëve të tyre.

“Sot në Bruksel është mbajtur mbledhja e tretë e Grupit Punues për targa. Delegacionet e ekspertëve të Kosovës dhe Serbisë u angazhuan në një diskutim të thelluar. Kam besim se do të gjejnë një zgjidhje të përhershme për të mirën e qytetarëve të tyre”, ka shkruar Lajçak në Twitter.

Today, the third meeting of the Working Group on Licence Plates took place in Brussels. Expert delegations of Kosovo and Serbia engaged in an in-depth discussion. I am confident that they will find a permanent solution for the benefit of their citizens.

— Miroslav Lajčák (@MiroslavLajcak) December 15, 2021

Më 20 shtator, Qeveria e Kosovës vendosi masën e reciprocitetit për targat e automjeteve me Serbinë.

Më 30 shtator, me ndërmjetësimin e Bashkimit Evropian, palët arritën një zgjidhje të përkohshme dhe të dyja shtetet më 4 tetor nisën vendosjen e letrave ngjitëse në simbolet shtetërore në targa.