Haradinaj i pikëlluar nga vdekja e avokatit Andrew Strong: Ishte një mik i çmuar i imi

Kryetari i AAK-së, Ramush Haradinaj, ka reaguar pas vdekjes së avokatit Andrew Strong, i cili ishte pjesë e ekipit mbrojtës të Kadri Veselit në Gjykatën Speciale.

Haradinaj thotë se Strong ishte luftëtar për të drejtat e njeriut dhe një mik i çmuar i tij.

“I pikëlluar nga vdekja e parakohshme e avokatit Andrew Strong, një luftëtar i jashtëzakonshëm për të drejtat e njeriut dhe një mik i çmuar i imi. Ai i’u bashkangjit ekipit tim mbrojtës si student nga Chicago, për t’u bërë më vonë një ndër avokatët më të respektuar për pasionin e tij në mbrojtje të drejtësisë. Ngushëllime familjes dhe miqve. Trashëgimia yte do të kujtohet Andy. U prehsh ne paqe”- ka shkruar Haradinaj.

Ramush Haradinaj ishte gjykuar për krime lufte dhe krime kundër njerëzimit në Tribunalin Penal Ndërkombëtar për ish-Jugosllavinë në Hagë.

Ai ishte shpallur i pafajshëm.

Lajmi për vdekjen e Strong u bë i ditur nga ish-këshilltari i Kadri Veselit, Avni Bytyçi.

“Para pak çastesh ka vdekur Andrew Strong, avokat i z. Kadri Veseli. Andrew për të gjithë ne ka përfaqësuar idealen, besnikërinë dhe njëriun e palodhshëm që lufton për të vërtetën. Andrew Strong me plot meritë e meriton titullin avokat mbrojtës i Ushtrisë Çlirimtare të Kosovës. Ai kishte mbrojtur edhe z. Haradinaj në Hagë. Andrew ishte amerikan, por me zemër ishte shqiptar. Fliste bukur shqip dhe e donte fort Kosovën. Ai jetoi duke e mbrojtur histrorinë e luftës tonë çlirimtare. Me quante vëlla në shqip, e me trajtonte si të tillë. Do të na mungojë shumë të gjithëve që e njohem dhe punuam me të. Ngushëllime gruas së tij Rachel, dhe tre fëmijeve që la pas”- ka shkruar Bytyçi.