Senati i UP Avancon të Dyshuarin për Plagjiaturë

Një anëtar i stafit akademik të Universiteti të Prishtinës (UP), dr. Selim Bezeraj, u avancua të mërkurën si Profesor Asistent, nga senati i këtij universiteti, pavarësisht dyshimeve serioze dhe të bazuara për përfshirjen e tij në një skandal plagjiature.

Një hulumtim i Gazetës Jeta në Kosovë zbuloi se Bezeraj, shef i Departamentit të Historisë në UP dhe asistent në Fakultetin e Filozofisë, mund të ketë bërë plagjiaturë me temën e diplomës së një studenti austriak.

Gazeta JNK konfirmoi në mënyrë të pavarur se pjesë të tëra nga tema e diplomës së Adam Christian në Universitetin e Vjenës, paraqiten identike dhe pa asnjë presje të ndryshuar, në një punim shkencor të Bezeraj, si dhe në temën e tij të doktoraturës të mbrojtur në Universitetin e Tiranës.

Më poshtë jepen për ilustrim tri paragrafë duke filluar nga punimi i Adam Christian nga Universiteti i Vjenës (në gjermanisht), për të vazhduar me punimin e dr. Bezeraj të cilin e ka shkruar në gjermanisht dhe temën e doktoraturës të përfunduar në Tiranë në vitin 2014 (në shqip).

Nga punimi i Adam Christian:

Auch in den anderen größeren Städten des Landes fanden Festlichkeiten zu Ehren des neuen albanischen Fürsten statt. In Skutari (heute Shkodra), einem Kerngebiet der ka-tholischen albanischen Bevölkerung, fand ein Umzug und Ansprachen statt, ein Tedeum wurde zelebriert. Die Feierlichkeiten waren stark katholisch geprägt, was von dem mus-limischen Teil der Bevölkerung natürlich nicht mitgetragen wurde, wie Karl Halla, der Lei-ter des Generalkonsulates in Skutari zu berichten wusste.

Nga punimi shkencor i Selim Bezeraj:

Auch in den anderen größeren Städten des Landes fanden Festlichkeiten zu Ehren des neuen albanischen Fürsten statt. In Skutari (heute Shkodra), einem Kerngebiet der katholischen albanischen Bevölkerung, fand ein Umzug und Ansprachen statt, ein Tedeum wurde zelebriert. Die Feierlichkeiten waren stark katholisch geprägt, was von dem muslimischen Teil der Bevölkerung natürlich nicht mitgetragen wurde, wie Karl Halla, der Leiter des Generalkonsulates in Skutari zu berichten wusste.

Nga tema e doktoraturës së Selim Bezeraj:

Po ashtu edhe në qytetet tjera të mëdha të vendit u festua në nderim të princit të ri të Shqipërisë. Në Skutar (Shkodër), epiqendër e popullsisë katolike, u mbajtën fjalime dhe u këndua Te-Deum-i. Festimet kishin një karakter të fortë katolik, gjë e cila sigurisht që nuk u mbështet nga pjesa myslimane e popullsisë, kjo sipas njoftimit nga Karl Halla, kryesues i konsullatës së përgjithshme në Shkodër.

Redaksia e gazetës arriti të sigurojë edhe komunikime zyrtare të UP-së, përfshi edhe shkresa nga ish-rektori Ramadan Zejnullahu, në të cilat paraqiten në rrugë zyrtare dyshimet për plagjiaturë.

Vetë Bezeraj nuk iu përgjigj telefonatave të përsëritura të redaksisë në telefonin e zyrës dhe atë personal, dhe as një emaili dërguar në adresën e tij zyrtare elektronike në UP.

Ndërkaq, prorektori për Mësim dhe Çështje të Studentëve, Naser Sahiti, i tha gazetës se nuk kishte dijeni për rastin, dhe rrjedhimisht, redaksia i vuri në dispozicion të gjithë dokumentacionin e nevojshëm.

Por, të gjitha këto fakte dhe rrethana nuk e penguan senatin e UP-së që pa asnjë votë kundër, të miratojë avancimin e Bezeraj në titullin Profesor Asistent.

Më poshtë, hulumtimi i plotë i Gazetës JNK për rastin në fjalë:

Shefi i Departamentit të Historisë në UP Dyshohet për Plagjiaturë