Hilmi Jashari duke u ligjruar studentëve | Foto: KALLXO.com
Nuk Mund të Luftohet Korrupsioni me Lëndë të Pazgjidhura
Në takimin e organizuar me studentë të fakulteteve juridike nga Lëvizja Fol ligjëroi avokati i popullit, Hilmi Jashari.
Tema kryesore e ligjërimit ishte integriteti i gjyqësorit në Kosovë, por Avokati i Popullit adresoi edhe raportin e qeverisë dhe Kuvendit me gjyqësorin.
Hilmi Jashari foli edhe për numrin e madh të lëndëve në gjyqësor dhe prokurori.
Në fjalën e tij, z. Jashari kritikoi reformën në drejtësi sa i përket trajtimit të lëndëve të pazgjidhura.
“Reforma nuk doli mirë, sepse nuk janë llogaritur lëndët e reja që vijnë në gjyqësor dhe numri i lëndëve të pazgjidhura ka mbetur i njëjtë”, tha Jashari.
Në këtë kontekst, Jashari theksoi se korrupsioni nuk mund të luftohet kur ka numër të madh të lëndëve të pazgjidhura.
Më tutje shtoi se numri i lëndëve të pazgjidhura në bazë të një raporti të bërë nga vetë institucioni i Avokatit të Popullit është rreth 117,000.
Gazeta Jeta në Kosovë kishte shkruar për përpjekjet e gjyqësorit që të zgjidhë lëndët e grumbulluara.
Jashari pati edhe një kërkesë për kryeministrin e ri në detyrë.
“Krijimi i Grupit Ndërministror për Mbrojtjen e të Drejtave të Njeriut ka qenë kërkesë e Avokatit të Popullit të cilën Kryeministri i kaluar e ka realizuar dhe ky komision ka mbajtë një mbledhje. Shpresoj që edhe kryeministri i ri të vazhdojë një gjë të tillë”, tha z. Jashari në ligjëratën para studentëve.
