Foto-ilustrim
Lirohen Çmimet e Ndërtimit
Sipas Agjencisë së statistikave çmimet e sektorit të ndërtimit janë më të ulëta në tremujorin e dytë të këtij viti në raport me periudhën janar-prill.
“Indeksi i tërësishëm i kostos të ndërtimit në Kosovë (IKN) në tremujorin e dytë (TM2) 2016 pësoi rënie prej (-1.5%), krahasuar me TM1 2016,” thuhet në publikimin e ASK-së.
Në këtë rënie të çmimeve ndikoi lirimi i energjisë dhe transportit, por rënia u neutralizua nga rritja e kostove të pagave.
“Rënia më e madhe ishte te: kategoria e energjisë (-17.3%); transporti (-16.7%); materialet ndërtimore (-1.4%); si dhe kostot e tjera (-0.9%). Rënia u neutralizua kryesisht nga ngritja e çmimeve te kategoritë: paga (0.2%), si dhe materialet (materialet elektrike, 0.8% dhe hidro-sanitare, 0.8%,” bën me dije ASK-ja.
Më të ulëta çmimet në këtë tremujor janë edhe në krahasim edhe me periudhën e njëjtë të vitit të kaluar.
“Kurse Indeksi i Tërësishëm i Kostos së Ndërtimit në Kosovë (IKN) në TM2 2016 pësoi rënie prej (-1.9%), krahasuar me periudhën e njëjtë të vitit të kaluar (TM2 2015). Rënia më e madhe u vërejt te kategoritë: transporti (-33.3 %); energjia (-16.5 %); materialet ndërtimore (-1.0%); materialet elektrike (-1.0%) si dhe kostot e tjera (-0.1%),” sqaron ASK-ja.
Edhe në krahasim të muajve prill-qershor të këtij viti dhe vitit të kaluar Pati ngritje çmimesh që zvogëluan rënien e çmimeve në sektorin e ndërtimit.
“Rënia u neutralizua kryesisht nga ngritja e çmimeve ta kategoria e makinerive prej (3.3%) si dhe të materialet hidro-sanitare (1.9%),” thuhet në publikimin e ASK-së.