Kadri Veseli flet për koalicionin pas dorëheqjes së Ramush Haradinajt
Kryetari i Kuvendit, Kadri Veseli, ka reaguar pas ftesës që Gjykata Speciale i ka bërë Ramush Haradinajt, e që pasoj me dorëheqjen nga posti i kryeministrit nga ky i fundit.
Veseli ka shkruar në Facebook se me keqardhje ka mësuar nga mediat thirrjen që i është bashkëluftëtarëve të tij dhe dorëheqjen e Haradinajt.
“Lufta e Ushtrisë Çlirimtare të Kosovës ka qenë e pastër dhe e drejtë dhe jam i sigurt se ndërshmëria e luftës së popullit tonë për liri e pavarësi ka për t’u vërtetuar sërish”, ka shkruar Veseli.
Ai ka thënë se koalicioni qeveritar u ndërtua për të marrë vendime të mëdha për Kosovën dhe për t’i mbrojtur vlerat e UÇK-së.
“Të gjitha veprimet dhe vendimet tona do të jenë vetëm në shërbim të interesave më të mira të Kosovës dhe qytetarëve tanë, si dhe në përputhje të plotë me ligjet tona”, ka shkruar kryetari Veseli.
Historiku i Gjykatës Speciale:
Me 82 vota për, 5 kundër dhe 1 abstenim, deputetët e asaj legjislature i kishin votuar ndryshimet e nevojshme kushtetuese të cilat i kishin hapur rrugë themelimit të kësaj gjykate të kërkuar nga bashkësia ndërkombëtare.
Në atë kohë, kryeministër kishte qenë Isa Mustafa, ndërsa zëvendëskryeministër Hashim Thaçi.
Ky i fundit kishte qenë shumë i zëshëm në mbështetjen e krijimit të kësaj Gjykate.
Gjykata Speciale për Kosovën në përbërjen e saj do të ketë vetëm prokurorë e gjykatës ndërkombëtarë.
Ajo ka filluar punën muajve të fundit, kur ka ftuar disa ish figura të larta të Ushtrisë Çlirimtare të Kosovës.
Lëvizja Vetëvendosje kishte qenë partia e vetme e cila unanimisht kishte votuar kundër krijimit të kësaj Gjykate, ndërsa nga partitë e tjera ka pasur disa figura të pakta që kanë votuar kundër.
