Izetbegoviq Nderon Viktimat Serbe të Bosnjës

Izetbegoviq tha se ishte e trishtueshme që një gjë e tillë kishte ndodhur dhe se të gjithë duhet të përpiqen të sigurohen që të mos ndodhë përsëri. “U ndjeva i detyruar për ta bërë këtë.  Duhet të kisha ardhur këtu më herët,” tha Izetbegoviq, duke iu referuar ceremonisë.

Numri i civilëve serbë dhe kroatë të Bosnjës të vrarë dhe hedhur në një greminë në Kazano, pranë Sarajevës, në vitin 1993, ende nuk është përcaktuar zyrtarisht, edhe pse kanë kaluar më shumë se 20 vjet që nga përfundimi i luftës së viteve 1992-1995.

Izetbegoviq theksoi se të gjithë njerëzit në shtet duhet të bashkohen për ta zgjidhur këtë, si dhe probleme të tjera të ngjashme.

“Unë jam i gatshëm të bëj përpjekje të veçanta në këtë. I bëj thirrje të gjithë serbëve, boshnjakëve dhe kroatëve të raportojnë vendet e vrasjeve dhe të ndihmojnë njerëzit të cilët ende nuk i kanë varrosur anëtarët e familjeve të tyre,” tha Izetbegoviq.

Ai tha gjithashtu se shpresonte që vizita e tij do të frymëzojë zyrtarë të tjerë boshnjakë që të bëjnë lëvizje të ngjashme.

“Por ky nuk është qëllimi kryesor i vizitës sime. Thjesht e ndieja dhe e kisha për detyrë ta bëja këtë,” tha Izetbegoviq.

Miladin Vidakoviq, president i Këshillit Qytetar Serb, tha se ai ishte i befasuar nga vizita e Izetbegoviqit.

“Fakti që kryetari i Presidencës Boshnjake dhe lideri i boshnjakëve ka vizituar Kazanin tregon se ky është një kontribut i madh për paqen dhe tolerancën në Bosnje dhe Hercegovinë,” tha Vidakoviq.

Ai tha se për vite me radhë ishin bërë përpjekje për të shënuar përvjetorin e vrasjeve të kryera në atë vend, por kjo kishte qenë e vështirë për shkak të pakalueshmërisë së rrugëve.

“Prandaj duhet të ndërtohet një rrugë dhe gjithashtu të vihet një tabelë përkujtimore me emrat e civilëve të pafajshëm të vrarë në këtë vend. Për fat të keq, emrat e këtyre individëve nuk dihen ende me siguri,” tha Vidakoviq.

Samir Bejtiq është në gjyq për krime lufte në Kazani. Gjyqi i tij filloi më shumë se dhjetë vjet më parë. Ai ka rinisur për herë të katërt në Gjykatën Kantonale në Sarajevë.

Një sërë anëtarësh të Brigadës së Dhjetë të Malit të Ushtrisë Bosnjës janë dënuar për kryerjen e vrasjeve në Kazani gjatë luftës.