Ministri Uran Ismaili - Foto: Facebook/UranIsmaili

Ismaili - Mustafës: Fjalët nuk rrëzojnë qeveri

Ministri i Shëndetësisë dhe nënkryetari i PDK-së Uran Ismaili i është kundërpërgjigjur kryetarit të Lidhjes Demokratike të Kosovës, Isa Mustafa në lidhje me rrëzimin e Qeverisë.

Ismaili ka thënë se Qeveria nuk rrëzohet kur kryetari i opozitës frikësohet të thërras seancë për mocion mosbesimi.

“Fjalët nuk rrëzojnë qeveri”, ka shkruar Ismaili në Facebook.

Më tej, Ismaili ka thuar se Isa Mustafa dhe LDK-ja duhet ta kuptojnë se problemet e LDK-së nuk janë edhe shqetësime të qytetarëve.

“LDK-ja çdo ditë po dëshmon se është joserioze me opsionin e vet si alternativë qeverisëse. Paaftësia e saj për të udhëhequr brenda partisë po tregon se ajo nuk është e gatshme të udhëheq as vendin”, ka deklaruar Ismaili. 

Duke folur për qeverisjen Mustafa, Ismaili ka thënë se LDK-ja i ka bërë dëm të pallogaritshëm shëndetësisë në Kosovë.

“Të sëmurët e varfër kanë paguar ilaçe shumëfish më shtrenjtë dhe kanë marrë shërbime shëndetësore që nuk përkojnë me dinjitetin njerëzor. Udhëheqja e juaj ka prodhuar keqmenaxhime të barnave dhe ka sjellë spitale pranë rrënimit etj”, ka thënë ministri Ismaili.

Më poshtë mund të lexoni postimin e plotë të ministrit të Shëndetësisë dhe nënkryetarit të PDK-së, Uran Ismaili: 

Isa Mustafa po thërret për rrëzimin e Qeverisë, por po harron se Qeveria nuk mbahet gjallë kur udhëheqësi i saj dorëzohet, siç bëri ai me Qeverinë që drejtonte. Qeveria nuk rrëzohet as kur kryetari i opozitës frikësohet të thërret seancë për mocion mosbesimi. Fjalët nuk rrëzojnë qeveri.

Isa Mustafa dhe LDK-ja duhet ta kuptojnë se problemet e LDK-së nuk janë edhe shqetësime të qytetarëve.

LDK-ja çdo ditë po dëshmon se është joserioze me opsionin e vet si alternativë qeverisëse. Paaftësia e saj për të udhëhequr brenda partisë po tregon se ajo nuk është e gatshme të udhëheq as vendin.

Koalicioni i Isa Mustafës i proklamuar me LVV-në dhe temat e proklamimit me fjalët e luftës kundër korrupsionit dhe flirtimi me njerëz partiakë të korruptuar janë ogur i zi për pikën kritike ku ka mbërritur LDK-ja.

LDK-ja e përçarë thellë, por e mbajtur e bashkuar nga ambicia për ta marrë pushtetin bashkë me Lëvizjen Vetëvendosje nuk ofron as afër zgjidhjen e problemeve të qytetarëve. Në situatën ku është zhytur ajo nuk mund të krijojë front në luftë kundër korrupsionit.

Përkundrazi!

Vetëm në ministrinë që unë e drejtoj e kam parë nga afër se si qeverisja e LDK-së nën udhëheqjen e Isa Mustafës i ka trajtuar njerëzit më në nevojë. Politikat e tyre kanë qenë më se të dëmshme për qytetarin.

Të sëmurët e varfër kanë paguar ilaçe shumëfish më shtrenjtë dhe kanë marrë shërbime shëndetësore që nuk përkojnë me dinjitetin njerëzor. Udhëheqja e juaj ka prodhuar keqmenaxhime të barnave dhe ka sjellur spitale pranë rrënimit etj.

Dëmi që LDK-ja i ka bërë vetëm shëndetësisë është i pallogaritshëm.

Kemi ndalur çmimet abuzive që i keni lejuar ju. Kemi shtuar shërbimet shëndetësore. Jemi duke kthyer shëndetësinë që ju me qeverisje të keqe ia morët popullit.

Ju keni vetëm fjalë dhe kalkulime politike. Në fakt, nuk keni pasur kurrë më shumë sesa kaq.