Gjykata e Apelit, Prishtinë | Foto: Kallxo.com
Gjykata e Apelit e lë në paraburgim shtetasin turk
Gjykata e Apelit e ka refuzuar ankesën e shtetasit turk, Y.D, duke e lënë kështu në paraburgim sipas vendimit të Gjykatës Themelore të Gjilanit.
Në një njoftim për media të Gjykatës së Apelit bëhet e ditur se Y.D dyshohet për kontrabandim me migrantë.
“Gjykata e Apelit e Kosovës, ka lënë në fuqi masën e paraburgimit prej një muaji, ndaj të pandehurit Y.D, shtetas i Republikës së Turqisë”, thuhet në vendimin e Apelit.
Në këtë formë, kolegji i kësaj gjykate, e ka refuzuar ankesën e avokatit mbrojtës kundër aktvendimit të Gjykatës Themelore në Gjilan, të datës 02.05.2018.
Në njoftimin e Apelit bëhet e ditur se Y.D dyshohet nga ana e prokurorisë se ka kryer veprën penale kontrabandim më emigrantë nga neni 170 paragrafi 1. të Kodit Penal të Republikës së Kosovës.
“Gjykata e Apelit vlerëson se gjykata e shkallës së parë, drejt ka gjetur se meqenëse ekziston dyshimi bazuar se i pandehuri ka kryer veprën penale të lartcekur, ka bazë ligjore për caktimin e paraburgimit ndaj tij, konform dispozitave te nenit 187 të Kodit të Procedurës Penale të Republikës së Kosovës”, thuhet në vendimin e Apelit.