Gjendet i Vdekur Personi i Zhdukur në Malishevë

Zëdhënësja e Policisë Rajonale të Gjakovës, Lirie Podrimaj, ka konfirmuar për KALLXO.com lajmin se Enver Kelmendi (1963) nga Balinca e Malishevës është gjetur i vdekur afër fshatit Mirushë.

“Rreth orës 17:25 afër një pylli në fshatin Mirushë është gjetur trupi i pajetë i qytetarit Enver Kelmendi”, ka thënë Podrimaj për KALLXO.com.

Gjatë ditës, Policia e Malishevës kishte ndërmarrë të gjitha veprimet hetimore për ta gjetur shtetasin Enver Kelmendi, i paraqitur si i zhdukur nga familja e tij.

Sipas familjarëve, Enveri për herë të fundit është parë dje në qendër të Malishevës duke lëvizur me veturën e tij.

Xhavit Kelmendi, vëllai i të zhdukurit, ka thënë sot gjatë ditës për KALLXO.com se vëllai i tij është në gjendje të mirë psikologjike dhe nuk ka pasur probleme me askënd.

Kurse, kapiten Halil Morina kishte konfirmuar për KALLXO.com se Policia e Malishevës ka ndërmarrë të gjitha veprimet hetimore për gjetjen e të zhdukurit.