Lirimi i vilave të sekuestrua të rastit Brezovica, reagon kryeprokurori i Ferizajt
Prokuroria Themelore e Ferizajt e ka konfirmuar se do të parashtrojë ankesë ndaj vendimit të GJykatës së Pejës për lirimin e 75 vilave të sekuestruara në rastin e njohur “Brezovica”.
Gjykata e Pejës ka marrë vendim që të liriojë vilat e sekuestruara.
Lidhur më këtë vendim, kryeprokurori i prokurorisë së Ferizajt Shukri Jashari konfirmoi për KALLXO.com do të ushtrojnë ankesë.
‘’Patjetër, patjetër ankesë kemi me ba” – tha fillimisht kryeprokurori Jashari.
Ai nuk pranoi ta komentonte vendimin e Gjykatës së Pejës për lirimin e vilave.
“Vendimet e gjykatës na nuk i komentojmë, na kemi të drejtë ankese” – tha tutje kryeprokurori Jashari.
Gjykata e Pejës në nëntor të vitit të kaluar kishte urdhëruar për sekuestrimin e përkohshëm të 75 vilave në Brezovicë, në Zonën e dytë të Parkut Kombëtar ‘’Sharri’’.
Gjykata e Pejës kishte aprovuar kërkesën e Prokurorisë së Ferizajt të datës 14 tetor të këtij viti, kur edhe ishte kërkuar sekuestrimi i tyre.
KALLXO.com e kishte siguruar listën e plotë të pronave për sekuestrimin e të cilave kishte vendosur Gjykata e Pejës.
Në të janë të renditura vilat e politikanëve, gjyqtarëve, biznesmenëve dhe qytetarëve të tjerë.
Gjykata themelore në Pejë, ditën e enjte, e ka hedhur poshtë kërkesën e prokurorisë së Ferizajit për caktim të masës së re të sigurisë për pronat e sekuestruara në rastin Brezovica.
Sipas vendimit të gjykatës të siguruar nga Kallxo.com, kjo kërkesë është refuzuar për arsye se parashtrimi i kërkesës së re për masë të sigurisë për pronat e sekuestruara është bërë pas afatit të përcaktuar me ligj.
Sipas arsyetimit të urdhrit të gjykatës, thuhet se ‘’Ligji i cili ka qenë në fuqi në kohën e sekuestrimit të përkohshëm të objekteve të cekura më lartë, ka paraparë ‘brenda gjashtëdhjetë ditëve nga konfiskimi i ndërtesës, pasurisë së paluajtshme, pasurisë së luajtshme, prokurori i shtetit kërkon masë të përkohshme për sigurimin e pasurisë’.
“Gjykata Themelore në Pejë gjeti se kërkesa e Prokurorisë Themelore në Ferizaj për masë të përkohshme për sigurimin e pasurisë së sekuestruar, është e pasafatshme”, thuhet tutje në arsyetim të vendimit të gjykatës.
Kundër këtij vendimi të gjykatës, palët kanë të drejtë ankese.
Kryetar komune, drejtorë, inspektorë nga niveli lokal dhe sekretarë, inspektorë e kryeinspektor nga niveli qendror, janë pjesë e aktakuzës voluminoze të Prokurorisë së Ferizajt në rastin e njohur “Brezovica”.
Mbi 1 milion euro pretendohet të jenë marrë ryshfet në këmbim të lejeve ndërtimore në zonën e Brezovicës.
Pjesa më e madhe e këtyre parave përshkruhet të ketë përfunduar në “xhepat” e ish-kryetarit të Komunës së Shtërpcës, Bratisllav Nikoliq, i cili kontrollonte secilin aplikim për leje ndërtimore në Parkun Kombëtar “Sharri”, zonë e Brezovicës.
Në këtë çështje bashkë me ish-kryetarin e Shtërpcës Bratisllav Nikoliq, për veprat penale: marrja e ryshfetit, keqpërdorimi i detyrës zyrtare dhe ushtrimi i ndikimit akuzohen edhe pesë persona të tjerë: Dimitrije Raiçiçeviq, Rijad Hasani, Hajrush Ajvazi, Labinot Vitija dhe Hysein Ajdini.
Të gjitha raportimet nga Kallxo.com, lidhur me rastin Brezovica mund t’i gjeni në këtë LINK.
