Aivo Orav; Foto: Delegacioni i BE-së në Mal të Zi
U raportua që Aivo Orav do të jetë shef i ri i Zyrës së BE-së në Kosovë, përgjigjen nga BE-ja
Në mediat në Kosovë gjatë ditës kanë qarkulluar lajme se në kuadër të rotacionit të madh në pozitat diplomatike të Bashkimit Evropian nëpër botë, ambasadori i tanishëm i BE-së në Estoni, Aivo Orav është zgjedhur shefi i ri i Zyrës së bllokut evropian në Kosovë.
Por, nga Bashkimi Europian kanë thënë për Kallxo.com se procesi është i brendshëm dhe nuk do bëhet publik deri në zgjedhjen përfundimtare.
Peter Stano, zëdhënës kryesor për Politikë të Jashtme dhe Siguri në Bashkimin Europian, tha se procedura e vendosur për emërimin e ambasadorëve parashikon që “pas miratimit të emrit/eve nga Kolegji (=Komisioni Evropian – Kolegji i Komisionerëve), Përfaqësuesi i Lartë, në cilësinë e Autoritetit Emërues, do të marrë vendimet e tij për emërimet konkrete”.
“Secili Ambasador i emëruar i BE-së duhet më pas ta marrë agremanin nga vendi pritës si parakusht për shtyerjen përpara të procedurës së emërimit të tij/saj. Vetëm pasi të përfundojë e gjithë kjo procedurë do t’i shpallim emrat dhe emërimet”- tha Stano.
Sipas tij, nuk ka asnjë ndryshim të afërt të kryetarëve në delegacionet të Bashkimit Europian në mbarë botën.
“Rotacioni i radhës i rregullt që do të përfshijë shefat e delegacioneve dhe zëvendëskryetarët e delegacioneve është planifikuar vetëm për gjashtë muaj, në shtator”- shtoi ai.
I përfoluri, ambasadori aktual i BE-së në Estoni, Aivo Orav, për të cilin u raportua se do të zëvendësojë ambasadorin e tanishëm, Tomas Szunyog, ka një karrierë diplomatike prej mbi tri dekadash.
Bazuar në CV-në e tij të publikuar nga Parlamenti Europian, Orav ka shërbyer në pozita të ndryshme diplomatike të rangut të lartë.
Së fundmi, Orav ka qenë Shef i Delegacionit të BE-së në Mal të Zi nga viti 2016 deri në vitin 2020, ku thuhet se ka luajtur rol vendimtar në avancimin e marrëdhënieve BE-Mali i Zi. Para kësaj, ai ka shërbyer si ambasador dhe shef i delegacionit të BE-së në Republikën e Maqedonisë së Veriut, nga viti 2012 deri në vitin 2016.
Përpara posteve që i ka mbajtur në Bullgari dhe Rumani, Orav ka shërbyer si ambasador në Poloni- nga viti 2000 deri më 2005. Qëndrimi i tij në Poloni u shënua nga përpjekjet për të rritur dialogun politik dhe bashkëpunimin ekonomik midis Estonisë dhe Polonisë.
Pas detyrës së tij në Bullgari, ai mori rolin e ambasadorit në Rumani, me qendër gjithashtu në Poloni, nga viti 2001 deri në 2005.
Përpara roleve të tij ambasadoriale, Orav mbajti disa poste kyçe në Ministrinë e Punëve të Jashtme të Estonisë. Nga viti 1999 deri në vitin 2000, shërbeu si Drejtor i Divizionit për Politikat e Sigurisë dhe Organizatat Ndërkombëtare. Në këtë cilësi, ai kontribuoi në angazhimin e Estonisë në organizata të ndryshme ndërkombëtare.
Përvoja e diplomatit përfshin gjithashtu edhe shërbimin si ambasador në Liban (me vendbanim në Turqi), ambasador në Azerbajxhan (me qëndrim në Turqi) dhe ambasador në Turqi. Gjithashtu, ai ka mbajtur postin e Drejtorit Politik të Ministrisë së Punëve të Jashtme të Estonisë, ku thuhet se ka luajtur një rol kyç në formësimin e politikës së jashtme të Estonisë.
Në fillet e tij, nga viti 1998 deri në vitin 1999, Orav shërbeu si Sekretar i Parë për NATO-n dhe Bashkimin Evropian Perëndimor (WEU) në Departamentin Politik të Ministrisë së Punëve të Jashtme të Estonisë.
Nga viti 1995 deri në vitin 1998, ai ka shërbyer si Sekretar i Parë në Misionin e Përhershëm të Republikës së Estonisë pranë Organizatës për Siguri dhe Bashkëpunim në Evropë (OSBE) në Vjenë. Roli i tij ka përfshirë përfaqësimin e interesave të Estonisë brenda OSBE-së dhe kontributin në përpjekjet e organizatës në parandalimin dhe zgjidhjen e konflikteve.
Përpara pozitës të tij në Vjenë, Orav ka shërbyer si Sekretar i Dytë për OSBE-në në Departamentin Politik të Ministrisë së Punëve të Jashtme të Estonisë, nga viti 1992 deri në 1995.
Karriera e tij diplomatike filloi në vitin 1990, pas diplomimit në Universitetin Tartu, Fakulteti i Fizikës dhe Kimisë. Gjatë viteve, ai ka ndërmarrë programe të ndryshme edukimi dhe trajnimi, duke përfshirë Shkollën Estoneze të Diplomacisë dhe Kursin e Politikave të Çarmatimit dhe Sigurisë në Qendrën Marshall.
