Osmani: Është thjesht çështje kohe, Kosova do të jetë anëtarja e 47-të e Këshillit të Europës

Presidentja, Vjosa Osmani, është shprehur e bindur se Kosova do të jetë anëtarja e 47-të e Këshillit të Europës.

Kjo, sipas saj, është thjesht çështje kohe.

“Republika e Kosovës do të jetë anëtarja e 47-të e Këshillit të Evropës. Është thjesht çështje kohe. Në këtë rrugë, ne nuk do të cenojmë vlerat që përbëjnë themelin e vendit tonë. Pasi të arrijmë aty, ne do të vazhdojmë të qëndrojmë për shtyllat që përcakton Këshilli i Evropës: të drejtat e njeriut, demokracia dhe shteti i së drejtës. Ne nuk do të shërbejmë si dorë e zgjatur e Rusisë apo si model i sjelljes autokratike”- ka thënë ajo.

Ajo ka deklaruar se Kosova i është mirënjohëse të gjitha vendeve që e kanë mbështetur deri më tani.

“Së bashku, ne do të punojmë për ta bërë realitet këtë fitore të të drejtave të njeriut herët apo vonë”- ka shkruar ajo në rrjetin social “X”.

The Republic of Kosovo will be the 47th member of the Council of Europe.

It is just a matter of time.

On this path, we shall not compromise the values that form the very foundation of our country.

Once we’re there, we’ll continue to stand for the pillars that define the CoE:…

— Vjosa Osmani (@VjosaOsmaniPRKS) May 17, 2024

Ministrat e Jashtëm të shteteve anëtare të Këshillit të Europës (KiE) mbajnë mbledhje më 17.05.2024.

Çështja e anëtarësimit të Kosovës në këtë organizatë nuk është vendosur në agjendën e këtij takimi.

Në Kosovë kishte pritshmëri se në këtë takim do të vulosej që shteti më i ri në Europë do të bëhej anëtar i 47-të i KiE-së.

Kosovës nga disa shtete i është kërkuar dorëzimi i projektstatutit për themelimin e Asociacionit të Komunave me Shumicë Serbe në Gjykatë Kushtetuese si hap për të fituar mbështetjen e shumicës së përfaqësuesve të shteteve anëtare të KiE-së për anëtarësim në këtë organizatë.

Ministrja e Punëve të Jashtme dhe Diasporës, Donika Gërvalla- Schwarz, më 16.05.2024, i ka dërguar letër Presidentit të Asamblesë Parlamentare të Këshillit të Europës, për siç ka thënë ajo, zotimin për përgatitjen e një drafti që parasheh “krijimin e një mekanizmi për vetmenaxhim”.

Ky draft, siç ka thënë Gërvalla, do të dërgohet për interpretim në Gjykatën Kushtetuese deri në fund të muajit maj.

Më 16.05.2024, këshilltari për media i presidentes Osmani, Bekim Kupina ka deklaruar se për këtë veprim nuk ka pas “konsultim dhe dakordim” me shefen e shtetit.

Sipas tij, presidentja Osmani përkrahë vetëm “qëndrime dhe veprime paraprakisht të konsultuara, të koordinuara dhe të dakorduara” me institucionin e Presidencës, e që në rastin konkret kjo letër nuk është e tillë.