Asambleja Komunale e Suharekës themelon Teatrin e Qytetit

Javën e kaluar, Kuvendi Komunal i Suharekës ka votuar për themelimin e teatrit të këtij qyteti. Kërkesa për themelim të Teatrit të Qytetit të Suharekës është iniciuar nga Astrit Bytyqi, Burhan Sejdiu dhe Butrint Lumi. 

Regjisori Astrit Bytyqi, njëri nga iniciuesit për themelimin e teatrit të Suharekës, ka thënë për KALLXO.com se kërkesa për themelimin e Teatrit të Qytetit në Kuvendit Komunal ishte dërguar në muajin mars të këtij viti, por, siç ka thënë ai, për shkak të pandemisë mbledhja e asamblesë komunale nuk ishte mbajtur deri javën që shkoi. 

“Më 20 maj, Asambleja Komunale mbajti mbledhjen e radhës dhe si pikë e rendit të ditës ka qenë edhe kërkesa jonë për themelim të teatrit, ku me 20 vota për dhe 4 abstenime është votuar themelimi i Teatrit ne Suharekë”, ka thënë Bytyqi. 

Ai ka thënë se objekti ku do të veprojë teatri planifikohet të jetë gati në 2021 dhe parapëlqejnë që teatri të emërohet me emrin e regjisorit të ndjerë kosovar, Bekim Lumi, i cili vjen nga kjo komunë. 

“Hapin e parë sipas ligjit qe i përket komunës është marrë që të votohet në asamble themelimi i teatrit dhe tash duhet të takohemi dhe të shohim se si do të vazhdojmë me procedura tjera deri në finalizimin  e plotë të funksionalizimit të Teatrit. Ndërsa për emër vendoset në asamble”,  ka thënë Bytyqi. 

Ligjërisht, themelimi i teatrove të qyteteve bëhet nga asambletë komunale të qyteteve, ndërsa kriteret për themelimin përcaktohen me akt nënligjor nga Ministria e Kulturës. 

“Teatrot e qyteteve themelohen me vendim të Asamblesë Komunale. Komuna nuk mund të themelojë më shumë se një teatër të qytetit me status publik. Kriteret për themelimin e teatrove kombëtare dhe teatrove të qyteteve përcaktohen me akt nënligjor të nxjerr nga Ministria përkatëse për kulturë”, thuhet në Ligjin për Teatrot.