DnV i Reagon PZAP-it: Vendimet pa Bazë Mund ta Cenojnë Integritetin e Zgjedhjeve
Rrjeti i organizatave vëzhguese vendore “Demokracia në Veprim” tha sot se vendimi i Panelit Zgjedhor për Ankesa dhe Parashtresa për t’i dërguar në rinumërim kutitë e votimit për Prishtinën dhe Prizrenin mund ta dëmtojë integritetin e zgjedhjeve.
Në ditën kur PZAP urdhëroi rinumërimin e plotë për këto komuna, DnV tha se gjatë vëzhgimit të procesit të votimit dhe numërimit në ditën e zgjedhjeve për raundin e dytë për kryetarë të komunave, nuk ka evidentuar parregullsi serioze apo mospërfillje të procedurave zgjedhore të cilat mund të dëmtonin procesin apo të devijonin votën e qytetarëve.
“Konstatimet tona janë konfirmuar edhe gjatë pranimit të kutive të votimit dhe procedimit në mënyrë të rregullt të Formularëve të Përputhjes së të Dhënave dhe Rezultateve në Qendrën e Numërimit dhe Rezultateve (QNR)”, thuhet në komunikatën e DnV-së.
“Meqenëse kishte një proces të rregullt zgjedhor, jemi të habitur me vendimin e Panelit Zgjedhor për Ankesa dhe Parashtresa (PZAP) për të urdhëruar rinumërim të tërësishëm në komunën e Prishtinës dhe Prizrenit, si dhe rinumërim të pjesshëm në komunën e Dragashit dhe Rahovecit. Pavarësisht asaj që disa vende praktikojnë rinumërimin në rast të diferencës së ngushtë të rezultateve, një praktikë të tillë nuk e parasheh legjislacioni i Kosovës. Vendimet pa bazë të mjaftueshme mund të cenojnë integritetin e zgjedhjeve, të cilat nga të gjithë akterët u cilësua si ndër proceset më të mira zgjedhore në Kosovë”, vazhdon komunikata.
DnV u ka bërë thirrje subjekteve politike të përfshira në këtë proces që të përmbahen nga gjuha e urrejtjes dhe kontestimit të procesit zgjedhor dhe gjithashtu të mos ushtrojnë presion ndaj institucioneve përgjegjëse për menaxhimin dhe zbatimin e vendimeve.
“Në anën tjetër subjektet politike duke dërguar vëzhguesit e tyre në procesin e rinumërimit do të kontribuojnë që ky proces të ketë transparencë dhe legjitimitet”, thuhet në komunikatë.
