Scott: Në Serbi Gjithnjë e më Tepër Mite të Pavërteta për SHBA-të

Ambasadori i Shteteve të Bashkuara në Serbi, Kyle Scott, ka vlerësuar sot se mitet e pavërteta për Amerikën, të cilat siç ka theksuar ai, i plasojnë tabloidet e ndryshme në Serbi, janë bërë aq të shumta në numër, sa që populli serb “ka filluar të besojë në to”.

“Nëse i lexojmë tabloidet çdo ditë, do të mendoni se Amerika dëshiron vetëm gjëra të keqe për Serbinë, se Amerika është armik i Serbisë, se dëshiron kaos në Serbi dhe luftë në Ballkan. Të gjitha këto janë vetëm budallallëqe”, ka deklaruar ambasadori, Kyle Scott, sot në qytetin e Nishit.

Mëtutje, ai tha se politika e Shteteve të Bashkuara është e bazuar në atë që Serbia të jetë stabile dhe shtet i fortë, që jep kontribut në stabilitetin e gjithë rajonit, raporton agjencia Beta nga Beogradi.

Ambasadori Scott më herët gjatë ditës në Universitetin e Nishit ka mbajtur ligjëratë në temën e komentimit të gabuar të politikës së Shteteve të Bashkuara në Serbi.