Limaj ka Dyshime Rreth Ekspertizës së SMS-ve

Mbrojtja e të akuzuarve të Limajt dhe të tjerëve kanë kërkuar nga prokuroria që të vërtetohet se a është përpiluar nga ndonjë ekspert ndërkombëtar raporti i ekspertëve rreth SMS-ve dhe komunikimeve të rastit MTPT.

Limaj i quajti këto prova të prokurorisë-SMS-të dhe komunikimet  si “zemra e rastit”, andaj sipas tij duhet të dihet se a janë përpiluar nga ndonjë ekspert.

“Po flasim për një provë shumë të rëndësishme të cilën mund ta quajmë “zemrën e rastit”. Është normale të gjejmë ndonjë provë gjatë procedurës, por po flasim për një çështje që është thelbi i aktakuzës. Sepse për këtë jemi që 7-8 vjet këtu”, tha Limaj.

Sipas mbrojtjes, raporti në fjalë është i printuar në programin “Word” dhe nuk është as i vulosur, andaj ballafaqimi i dëshmitarit me këto SMS e përgjime të komunikimeve është i pamundur.

“Ky dokument nuk paraqet kurrgjë, nuk është zyrtar”, tha Limaj.

Prokurori Charles Hardaway tha se kjo shkresë i është dërguar nga paraardhësit e tij të cilët janë marrë me rastin.

Ndërkaq, në raport thuhet se prokurori ka angazhuar një ekspert ndërkombëtar për t’i analizuar SMS-të dhe komunikimet.

“Kam angazhuar një ekspert ndërkombëtar për t’i analizuar SMS-të dhe komunikimet”, ka shkruar prokurori në letrën e besimit.

Andaj, Limaj kërkoi ta dijë identitetin e personit ndërkombëtar, raportin nga eksperti dhe përvojën profesionale të të njëjtit.

Lidhur me këtë çështje, Hardaway bëri të ditur se do të kontaktojë me paraardhësit e tij me shpresën se do të marrë përgjigje në ditët në vijim.

Si rezultat, seanca u ndërpre me kërkesë të mbrojtjes.

Dëshmitari Ali Aliu i cili gjendej në gjykatë, në pritje për të dëshmuar, do të dëshmojë më 16 maj.

Në këtë proces, Fatmir Limaj akuzohet për krim të organizuar dhe shpërdorim detyre.

Në procesin e njëjtë me Limajn dhe për akuza të njëjta me të nga Prokuroria Speciale e Kosovës ngarkohen edhe Nexhat Krasniqi e Endrit Shala. Pjesë e gjykimit janë edhe Shpëtim Telaku dhe Florim Zuka.

Akuza ndaj Limajt lidhet me tenderët për mirëmbajtjen e rrugëve në komunën e Gjilanit.

Limaj këtë aktakuzë, që nga EULEX-i quhet e konsoliduar pasi në të janë bashkuar rastet MTPT 1 dhe MTPT 2, më 30 tetor të vitit 2015 e cilësoi të ngritur me urdhër politik.

Të gjitha raportet e KALLXO.com lidhur me këtë rast mund t’i gjeni në këtë link.