Limaj: Kurti ka ndryshuar shumë, është bërë i panjohur

Fatmir Limaj është shprehur i habitur me atë që e quan ndryshim radikal të kryeministrit Kurti, në raport me dialogun dhe çështjet e tjera.

“Nuk duhet të merren seriozisht deklaratat e Kurtit, ai është bërë një njeri tjetër, një i panjohur”, deklaroi Limaj.

Sipas tij, Kurti shpesh kishte thënë se nuk do takohej me Vuçiqin në dialog pa kërkuar falje Serbia e të tjera, gjë që sipas tij, këto nuk kanë ndodhur, por kanë ndodhur takimet e Kurtit me Vuçiqin.

Limaj tha se Kurti sikur ka një pajtim më Vuçiqin për një status-quo, sepse, sipas tij, nuk ka guxim e  ide për  ta përmbyllur këtë problem të madh.

Limaj: Po bëhen padrejtësi ndaj kategorive të luftës

Kreu i NISMA-s Socialdemokrate, Fatmir Limaj, ka thënë se është duke u bërë padrejtësi  ndaj kategorive të dala nga lufta nga Qeveria Kurti.

Në RTK PRIME, Limaj tha se asnjë qeveri nuk ka bërë sa duhet për veteranët dhe kategorive të tjera të luftës, por, sipas tij, kjo qeveri  është duke bërë padrejtësi. Limaj tha se edhe plotësim-ndryshimi i ligjit në vitin 2017 është duke u keqinterpretuar.

“ Nuk ka kategorizim dhe, derisa kjo nuk ndodhë, atëherë vlen ligji bazik dhe kjo nënkupton se paga e veteranit duhet të rritet bashkë me atë minimale”, tha Limaj.

Kreu i NISMA-s tha se Qeveria Kurti po bën mashtrime me çështjen e pagës minimale, sepse, sipas tij, me këtë veprim nuk ngarkohet buxheti i shtetit, por kompanitë private. Kjo, sipas Limajt, është pabarazi që po e bën qeveria aktuale.

Limaj ka folur edhe për çështjen e listave, por tha se kjo është përgjegjësi e qeverisë, sipas ligjit.  Ai tha se pastrimi i listave duhet të nisë nga kryeministri Albin Kurti, sepse, sipas tij, ai nuk është veteran luftëtar.

Limaj tha se krejt kjo çfarë po ndodhë është për ta forcuar diskursin anti UÇK.

“ Fatkeqësisht, vlera më e madhe e kombit- UÇK-ja, po cilësohet si ndërmarrje e përbashkët kriminale”, tha Limaj. Sipas tij, kjo është e papranueshme/RTK/.