Kryeprokurori Lumezi Flet për Përgjimet

Kryeprokurori i Shtetit, Aleksandër Lumezi, ka deklaruar sot se ka urdhëruar një analizë të fragmenteve të bisedave të përgjuara, të cilat janë publikuar një ditë më parë nga portali Insajderi.com për të parë nëse është kryer ndonjë vepër penale.

“Të gjitha materialet që tashmë janë publikuar janë në duart e prokurorëve… Ata do të shikojnë nëse mund të fillojë ndonjë ndjekje penale dhe nëse ka elemente të veprës penale”, shtoi Lumezi.

Po ashtu, siç raporton BIRN, Kryeprokurori Lumezi ka thënë se ka dëgjuar se “origjina e përgjimeve” është një hetim në një rast penal që është kryer më herët.

Pjesët e bisedave të përgjuara, që janë publikuar të hënën nga portali “insajderi.com”, tregojnë se si shefi i grupit parlamentar të PDK-së Adem Grabovci ka ndikuar në punësimin dhe emërimin e njerëzve në pozita të larta të shërbimeve publike.

Portali pretendon se incizimet, të cilat datojnë nga viti 2011, tregojnë se Grabovci ka ndikuar edhe në emërime në sistemin prokurorial dhe gjyqësor, si dhe në Policinë e Kosovës.

Ndërkaq, sot Zyra e Kryeprokurorit të Shtetit njoftoi se Lumezi do të mbajë nesër nga ora 10:00 një konferencë për media, gjatë të cilës do të deklarohet rreth këtyre audio-incizimeve.