Gjendet një i Vdekur në Shtëpinë e Djegur
Ende nuk dihen rrethanat të cilat çuan në vdekjen e 85-vjeçarit ditën e djeshme në Mitrovicë.
Trupi i pajetë është dërguar në Institutin e Mjekësisë Ligjore për obduksion.
Lajmin e ka konfirmuar zëdhënësi e Policisë së Kosovës për Rajonin e Mitrovicës Avni Zahiti.
“Jemi duke e pritur raportin nga Mjekësia Ligjore. Trupi i pajetë është gjetur pasi që është shuar zjarri në shtëpinë e tij dhe është herët të flasim për rrethanat e vdekjes”, tha Zahiti.
Për këtë rast Policia ka njoftuar edhe në raportin e saj 24 orësh.
“Në rrethana të panjohura është përfshirë nga zjarri një shtëpi. Njësitë relevante kanë dalë në vend të ngjarjes përderisa nga ana e zjarrfikësve është shuar zjarri. Pas lokalizimit të zjarrit, brenda shtëpisë është gjetur pa shenja jete viktima e gjinisë mashkullore”, thuhet në raportin e Policisë.
“Vdekja është konstatuar nga ekipi mjekësor dhe me urdhër të prokurorit, trupi i pajetë është dërguar në Institutin e Mjekësisë Ligjore për obduksion”, shton raporti.
Rasti nga Policia po trajtohet si shkaktim i rrezikut të përgjithshëm.
