Foto: KALLXO.com
Shtyhet gjykimi i dy policëve që akuzohen për 40 pako me dredhëza
Mungesa e përfaqësuesit të Zyrës Ligjore të Doganës së Kosovës ka bërë që të shtyhet seanca ndaj dy policëve, Ismet Deva dhe Bit Shala, të akuzuar për keqpërdorim të detyrës zyrtare.
Përfaqësuesi i Doganës ishte thirrur që të dëshmojë rreth caktimit të vlerave të sendeve të padoganuara me qëllim të sqarimit të saktë të vlerës së shmangies nga detyrimi doganor.
Si shkak i kësaj mungese, prokurori Ramiz Buzhala i propozoi Gjykatës që seanca të shtyhej me qëllim që të sigurohet prezenca e ndonjërit prej përfaqësuesve të Doganës.
Ndërsa trupi gjykues duke shtyrë seancën në kohë të pacaktuar vlerëso që së pari të sigurohet prezenca e përfaqësuesit të Doganës ose prova mbi lartësinë e dëmit të shkaktuar buxhetit të Kosovës të bërë me shkrim nga ana e tij, e më pas të caktohet seanca e radhës.
Në seancën e kaluar është dëgjuar udhëheqësi i pikës së kalimit kufitar Qafë-Morinë bashkë me dy dëshmitarë të tjerë.
Dy zyrtarët policorë, Ismet Deva dhe Bit Shala, po akuzohen nga Prokuroria për veprën penale të keqpërdorimit të pozitës së tyre zyrtare, duke lejuar kalimin e mallrave pa regjistrimin e tyre.
Në muajin maj, policët kishin kundërshtuar aktakuzën e Prokurorisë duke kërkuar që të hidhet si e pabazuar.
KALLXO.com ka raportuar edhe më herët për këtë rast.
Ismet Deva dhe Bit Shala ishin deklaruar të pafajshëm pranë Gjykatës së Gjakovës.
Ismet Deva dhe Bit Shala po akuzohen se në pikën kufitare Qafë-Prush, duke mos qenë kompetentë kanë lejuar hyrjen e mallrave, duke i shkaktuar dëm material Kosovës me vlerë 564.60 euro.
Prokuroria pretendon se në prill të vitit 2018, duke qenë në cilësinë e zyrtarëve policorë në pikë-kalimin kufitar Qafë-Prush kanë lejuar hyrjen e mallrave komerciale.
Sipas aktakuzës, dy zyrtarët policorë kishin lejuar që dy automjetet e ngarkuara me mallra komerciale të hynin në territorin e Kosovës, duke mos i regjistruar në sistemin SIMS.
Në aktakuzë thuhet se automjetin e parë të ngarkuar me perime dhe fruta të ndryshme e drejtonte Muhamet Tahiri, ndërsa automjetin e dytë i cili kishte 40 kuti me dredhëza, e drejtonte Bajram Gjoka.
Gjithnjë sipas aktakuzës, në atë kohë dhe në atë pikë kalimi kufitar nuk kishte oficer doganor si kompetent për të lejuar hyrjen e mallrave.
Mirëpo këto mallra janë lejuar që të hynin nga Republika e Shqipërisë në Republikën e Kosovës, duke i shkaktuar shtetit të Kosovës dëm material në shumë prej 564.60 euro.
