Vrasja e Marigona Osmanit - Mbrojtja e Arbër Sejdiut kërkon lirimin e tij

Dardan Krivaça dhe Arbër Sejdiu, të akuzuar për vrasjen mizore të Marigona Osmanit i kanë dhënë fjalët përfundimtare në gjykimin ndaj tyre.

Familja e Marigona Osmanit kërkoi dënim me burgim të përjetshëm për Krivaçën.

I akuzuari Dardan Krivaça tha se i vjen keq për atë çka ka ndodhur dhe se do të donte që ta kthente kohën pas.

Në fjalën përfundimtare avokatja e Arbër Sejdiut, Arbora Shefkiu, kërkoi që i njëjti të lirohet nga akuzat.

“Kur vendoset drejtësia për Marigonën duhet me u vendosë edhe për Arbërin njëjtë”, u shpreh Shefkiu.

“E vetmja përgjegjësi e Arbërit është prezenca e tij në banesë… I njëjti s`ka marrë veprime, s`ka dashtë me ndodhë ajo që ka ndodhë”.

Mbrojtja propozoi që gjykata të marrë aktgjykim lirues për Arbër Sejdiun.

Dardan Krivaça i cili shprehu keqardhje dhe tha se po të mundte, do bënte gjithçka të kthente kohën pas.

Ndërsa avokati Admir Salihu, mbrojtësi i Krivaçës, tha se nuk është kundërshtuar kurrë vrasja.

Kurse Prokuroria ka bërë ndryshimin e aktakuzës, duke e hequr në tërësi pjesën që thotë se vrasja është kryer me motivin e fshehjes së veprës penale të dhunimit.

Më 22 gusht 2021 ishte njoftuar se një 18-vjeçare ishte dërguar pa shenja jete në spitalin e Ferizajt.

Bëhej fjalë për Marigona Osmanin. Të dyshuar për këtë vrasjes janë Dardan Krivaça dhe Arbër Sejdiu.

“Policia ka marr DVR, e njëjta është dërguar për ekzaminim, ku janë tërhequr pamjet për periudhën kohore prej shtatëdhjetë e dy orë dhe atë nga data 19.08.2021 ora 00:05 deri më 23.08.2021 ora 00:18”, përshkruan aktakuza e Prokurorisë, e cila detajon edhe kohën e saktë dhe veprimet e dy të pandehurve brenda banesës.

Në aktakuzë theksohet se Prokuroria e ka konsideruar videon të besueshme dhe ngjarja është regjistruar prej datës 19 gusht 2021.

“Ne e konsiderojmë videon të besueshme dhe të saktë, videoregjistrimet tregojnë se në fillim, konkretisht, më 19.08.2021, raportet në mes të pandehurit Dardan Krivaça dhe të ndjerës kanë qenë të mira, këto raporte fillojnë të përkeqësohen kur aty paraqitet i pandehuri Arbër Sejdiu, i cili vije në orën 16:18, së bashku me Dardanin, ku me vete ka një çantë me rroba, në orën 19:02, të pandehurit bisedojnë lidhur me kamerat, si dhe shikojnë se cilat pjesë të korridorit i kap kamera ku lëvizin në pjesë të ndryshme për të verifikuar se cilat pjesë të korridorit i kap kamera dhe vërehet se rolin apo fjalën kryesore për këtë e ka Arbër Sejdiu, në orën 19:56, Arbëri merr rrobat e tij dhe del nga banesa së bashku me Dardanin”, shkruhet në aktakuzën e Prokurorisë.

Prokurori në aktakuzën e përpiluar, ka përshkruar se si është organizuar dhunimi e më pas vrasja e Marigona Osmanit.

Në aktakuzën e Prokurorisë të siguruar nga KALLXO.com tregohet se si kamerat e sigurisë që kanë qenë të vendosura në banesën e të pandehurit Krivaça, ka bërë që Prokuroria të sigurojë prova të forta për netët para ngjarjes fatale e për mënyrën se si u organizua dhunimi, e më pas vrasja e 18-vjeçares.

Sipas konstatimit të Prokurorisë, në korridor të banesës së të pandehurit ka pasur të vendosur një kamerë sigurie, e cila regjistronte 24 orë e që ka xhiruar edhe momente të ngjarjes.

“Regjistrimi ka kohën e saktë, kamera ka pamje nga dera e hyrjes së banesës dhe banjo, e njëjta ka pamje edhe të një pjese të derës së një dhome gjumi, si dhe një dhomë tjetër të cilën e kap vetëm një qosh, kjo e fundit edhe është dhoma ku janë kryer veprat penale”, përshkruhet në aktakuzë.

“Më 21.08.2021, ora 02:40, Dardan Krivaça, pas mesnate deri sa është në banjë me të ndjerën Marigona Osmani, e godet me dorë në fytyrë,  04:52, dalin nga banesa, 09:53, i pandehuri Dardan Krivaça dhe e ndjera Marigona Osmani, kthehen ku vërehet se e ndjera nuk ka kontroll të plotë, i merren mendtë, 10:02, i pandehuri e dërgon në banjë të ndjerën Marigona Osmani, del në ora 10:14, ku vërehet se e njëjta reziston, mirëpo është kapur me duar dhe shtyhet me forcë drejt sallonit, 10:48, e dërgon me forcë në banjë, ku e ndjera është e zhveshur, ndërsa i pandehuri është veshur ku qëndrojnë deri në orës 11:09, kur dalin i pandehuri është zhveshur, dhe të ndjerën me dhunë e nxjerr nga banjë dhe e dërgon në dhomën e gjumit,  13:43, i pandehuri i cili është zhveshur i vendos kamerës një kapelë e cila mbulon pamjen deri në orën 19:57”, përshkruhet në aktakuzë.

Raportimet e KALLXO.com lidhur me këtë rast  – LINK