Prattipati takohet me përfaqësuesit e Listës Serbe, thekson rëndësinë që serbët të jenë pjesë e institucioneve
E Ngarkuara me Punë në Ambasadën amerikane në Kosovë, Anu Prattipati është takuar me përfaqësues të Listës Serbe, më 15.08.2025.
Siç njofton Ambasada amerikane, Prattipati ka theksuar se pjesëmarrja e gjerë e të gjitha partive të konsoliduara është esenciale që të sigurohet, në mënyrë që secili komunitet të ketë zë në të ardhmen e Kosovës.
“E Ngarkuara me Punë ka theksuar rëndësinë e pjesëmarrjes së komunitetit serb të Kosovës dhe përfaqësuesve të tyre në punën e institucioneve të Kosovës” – thuhet mes tjerash në komunikatën e Ambasadës amerikane.
Ambasada thekson se vetëm përmes angazhimit aktiv, “zëri i qytetarëve, shqetësimet dhe nevojat e tyre mund të dëgjohen dhe adresohen”.
Lista Serbe ka fituar nëntë mandate në Kuvendin e Kosovës të dalë nga zgjedhjet e 9 shkurtit 2025.
Përfaqësuesit e serbëve në veri të Kosovës u larguan nga institucionet e Kosovës në nwntor të vitit 2022 pas shkarkimit të drejtorit të policisë për rajonin e veriut, Nenad Gjuriq për shkak të refuzimit të zbatimit të vendimit të Qeverisë së Kosovës për riregjistrimin e veturave.
Qeveria e Kosovës nga 1 nëntori i atij viti kishte filluar zbatimin e planit për riregjistrimin e automjeteve me targa të lëshuara nga Serbia për qytetet e Kosovës. Këto targa është dashur të zëvendësohen me ato që kanë mbishkrimin RKS (Republika e Kosovës).
Mitrovica e Veriut, Zveçani, Zubin Potoku dhe Leposaviqi kanë shkuar në zgjedhje më 23.04.2023, pas dorëheqjeve të kryetarëve serbë që kundërshtonin vendimet Qeverisë së Kosovës.
Pjesëmarrja në zgjedhje ishte e vogël si pasojë e bojkotit nga serbët lokalë – nxitur nga Lista Serbe.
Këto zgjedhje rezultuan me fitoren e katër kryetarëve shqiptarë në katër komunat të banuara me shumicë serbe.
Lulzim Hetemi nga Lëvizja Vetëvendosje u bë kryetar i Leposaviqit, Erden Atiq po ashtu nga e njëjta parti mori udhëheqjen e Mitrovicës së Veriut, ndërkaq në Zveçan dhe në Zubin Potok fituan Ilir Peci dhe Izmir Zeqiri- të dy nga Partia Demokratike e Kosovës.
Hyrja e kryetarëve shqiptarë në objektet komunale më 26.05.2023, përkundër rezistencës së banorëve lokalë, pati shkaktuar tensione në këtë zonë.
Në katër komunat me shumicë serbe në veri të Kosovës, më 21.04.2024, u organizua një referendum nëse qytetarët do donin ose jo t’i shkarkojnë kryetarët e tanishëm të nacionalitetit shqiptar. Votimi përfundoi në favor të kryetarëve komunalë.
Zgjedhjet e ardhshme lokale në nivel vendi do të mbahen më 12.10.2025.
