Policia tregon se si zbuloi më shumë se 1 mijë boksa cigare të kontrabanduara në Viti

Një bashkëpunim në mes Policisë dhe Doganës së Kosovës ka rezultuar në parandalimin e kontrabandimit të cigareve.

Veprimet e këtyre dy institucioneve nuk u pritën mirë nga të dyshuarit e këtij rasti, ku njëri prej tyre edhe sulmoi një nga policët, i cili më pas pranoi edhe tretman mjekësor për lëndimet trupore që pësoi.

Dje gjatë ditës në fshatin Smirë të Vitisë, Policia identifikoi një automjet të dyshuar me targa vendore, të cilën ishte duke e drejtuar njëri nga të dyshuarit.

Automjeti i parë që u identifikua ishte duke përcjellë automjetin e dytë, i cili ishte ngarkuar me mall i kontrabanduar.

Në automjetin me mall ndodheshin edhe dy të dyshuarit tjerë.

Policia tregoi se pas përpjekjes së zyrtarëve policor për ta ndaluar veturën e dytë të dyshuar, të dyshuarit rrezikuan seriozisht zyrtarët policorë dhe doganorë.

Vetura u tha se goditi një veturë zyrtare, e po ashtu të kanosur mbetën edhe zyrtarët policorë gjatë legjitimimit të të dyshuarve.

Madje, sipas PK-së, njëri prej tyre gjatë futjes nën kontroll të një personi të dyshuar, ishte sulmuar.

Policia tha se gjatë kontrollit të automjetit të dyshuar, të ngarkuar me mallra të kontrabanduara, janë hasur sasi prej 1 mijë e 299 paketime, boksa të tri llojeve të ndryshme cigaresh, në sasi të përgjithshme rreth 260 mijë cigare.

Në vazhdën e veprimeve hetimore, policët kontrolluan edhe shtëpitë e banimit të njërit të dyshuar, por nuk gjetën asgjë të dyshuar.

Gjithmonë duke iu referuar raportit policor, automjeti i dyshuar i lartcekur dhe malli i ngarkuar janë konfiskuar për t’ju nënshtruar procedurave të mëtejme në terminalin doganor – Dheu i Bardhë.

Për të gjitha veprimet e ndërmarra nga Policia e Kosovës, u tha se është njoftuar prokuroria kompetente dhe me urdhër të prokurorit përkatës dy persona të dyshuar janë ndaluar për 48 orë, ndërsa i dyshuari i tretë, identiteti i të cilit është i njohur për PK-në ndodhet në kërkim policor.