Policia: Afër trupit të pajetë të zyrtares policore u gjet arma zyrtare
Një zyrtare policore e rajonit të Gjilanit me gradë rreshter, e cila kishte punuar në operativën rajonale është gjetur e vdekur në hapësirat e varrezave të qytetit në Gjilan.
Policia e Gjilanit ka njoftuar se në afërsi të trupit të pajetë të zyrtares policore është gjetur arma e saj zyrtare.
Ajo ka qenë jashtë detyrës zyrtare gjatë ditës së sotme.
“Nga hetimet e para mësohet se viktima A.I., e moshës 53 vjeçare është zyrtare policore, jashtë detyrës zyrtare”, ka thënë Ismet Hashani për KALLXO.com.
KALLXO.com raportoi sot për ngjarjen tragjike që ndodhi në Gjilan.
Rreth orës 16:00 policia kishte marrë informacionin për një trup të pajetë në hapësirat e varrezave të qytetit të Gjilanit.
Me të marrë informacionet ekipet policore, ambulanca dhe prokurori i shtetit kanë dalë në vendin e ngjarjes.
Tutje është ftuar edhe Instituti i Mjekësisë Ligjore për të tërhequr trupin për obduksion.