PDK për propozimin evropian: I pamjaftueshëm dhe nuk arrin qëllimet e Kosovës

Partia Demokratike e Kosovës ka mbajtur sot mbledhjen e Këshillit Drejtues të saj, në të cilën është diskutuar për situatën e fundit politike në vend dhe propozimin evropian në kuadër të dialogut Kosovë-Serbi.

PDK  ka bërë të ditur se gjatë këtij takimi KD i kësaj partie është informuar nga kryetari Memli Krasniqi për takimet dhe diskutimet lidhur propozimin evropian për arritjen e marrëveshjes me Serbinë.

Sipas njoftimit, Krasniqi ka thënë se marrëveshja është e pamjaftueshme dhe nuk realizon qëllimet shtetërore të Kosovës dhe qytetarëve të saj.

“Nga një marrëveshje me njohjen e ndërsjellë në qendër, sot, fatkeqësisht, Kryeministri Kurti i ka sjellë vendit një marrëveshje të përkohshme me asociacionin në qendër”, citohet të ketë thënë Krasniqi.

Më pas KD i PDK-së ka miratuar një lidhur me aktualitetin politike dhe marrëveshjen finale mes Kosovës dhe Serbisë.

Përmes kësaj deklarate 7 pikëshe, PDK, ndër të tjerash i kërkon kryeministrit Kurti,  që marrëveshja ta ruaj unitetin e shteti dhe të mundësojë vendi njohjen formale të shtetësisë ana e pesë shteteve mosnjohëse të BE-së, nisjen e procesit të anëtarësimit në NATO dhe në BE.

Nesër në Ohër të Maqedonisë së Veriut do të mbahet një takim në mes të kryeministritAlbin Kurti, dhe presidentit të Serbisë, Aleksandar Vuçiq, me ndërmjetësimin e shefit të diplomacisë së BE-së, Josep Borrell. Gjatë këtij takimi pritet të arrihet edhe marrëveshja për planin e zbatimit të propozimit evropian për normalizim e raporteve Kosovë -Serbi.

 Deklarata e plotë e KD-së  së PDK-së:

1. Partia Demokratike e Kosovës në vazhdimësi e ka mbështetur dialogun për normalizimin e marrëdhënieve ndërmjet Kosovës dhe Serbisë dhe ka inkurajuar edhe Qeverinë aktuale që të angazhohet seriozisht në këtë proces, me qëllim të arritjes së qëllimeve shtetërore të Republikës së Kosovës, për të cilat është punuar për shumë vite me radhë.
2. Marrëveshja e propozuar aktualisht dhe e pranuar tashmë nga Kryeministri i Republikës së Kosovës, Albin Kurti, është e pamjaftueshme dhe nuk arrin qëllimet shtetërore të Republikës së Kosovës dhe qytetarëve të saj.
3. Partia Demokratike e Kosovës beson se vetëm një marrëveshje finale dhe gjithëpërfshirëse, ligjërisht e obligueshme dhe e garantuar ndërkombëtarisht, e përqendruar në njohjen reciproke ndërmjet Kosovës dhe Serbisë, mundëson paqe të qëndrueshme dhe avancim konkret të integrimit euro-atlantik të Republikës së Kosovës.
4. Më tutje, ne besojmë se marrëveshja duhet të ruaj karakterin unitar të shtetit tonë, brenda rregullimit aktual kushtetues, si dhe të krijojë mundësitë reale për njohjen formale të shtetësisë së Kosovës nga ana e pesë shteteve mosnjohëse të BE-së, nisjen e procesit të anëtarësimit në NATO, fillimisht përmes pjesëmarrjes në “Partneritet për Paqe”, si dhe marrjen e statusit të shtetit kandidat për anëtarësim në BE, pa u larguar nga respektimi i marrëveshjeve të arritura më parë.
5. Situata aktuale është pasojë e qasjes së papërgjegjshme të Kryeministrit Albin Kurti dhe gabimeve të njëpasnjëshme në procesin e dialogut dhe në raport me partnerët ndërkombëtarë të Republikës së Kosovës.
6. Partia Demokratike e Kosovës, si parti shtetformuese, gjithmonë e ka vendosur dhe do ta vendosë interesin shtetëror para interesit partiak.
7. Ne do të vazhdojmë komunikimin dhe koordinimin e ngushtë me partnerët ndërkombëtarë të Kosovës, për të shtyrë përpara aspiratën tonë të përbashkët për një shtet të konsoliduar në arenën ndërkombëtare dhe të integruar në familjen euro-atlantike.