Presidentja e Kosovës, Vjosa Osmani ka pritur në takim Presidentin e Shqipërisë, Bajram Begaj - 16 shkurt 2023 Foto: KALLXO.com
Osmani udhëton për në Shqipëri, do të takohet me presidentin Begaj e kryeministrin Rama
Presidentja e Kosovës, Vjosa Osmani ka udhëtuar për vizitë shtetërore dy ditore në Shqipëri, pas ftesës që mori nga Presidentit i Shqipërisë, Bajram Begaj.
Në shtetin fqinj, Osmani është thënë se do të pritet me nderime të larta shtetërore nga homologu i saj, Begaj.
“Përveç takimit tête à tête, të dy presidentët do të takohen edhe me delegacione” – thuhet në njoftimin e Presidencës së Kosovës.
Pas takimit, të dy presidentët është thënë se do ta mbajnë një konferencë të përbashkët për media, ndërkaq në mbrëmje Presidenti Begaj do të shtrojë darkë shtetërore për Presidenten Osmani dhe delegacionin nga Kosova.
“Presidentja do të shoqërohet nga Zotëria i Parë Prindon Sadriu, i cili gjatë ditës do të vijojë me agjendë të përbashkët me Zonjën e Parë të Shqipërisë, Armanda Begaj” – thuhet në njoftim.
Tutje gjithashtu është thënë se gjatë kësaj vizite, Presidentja Osmani do të takohet edhe me kryeministrin e Shqipërisë, Edi Rama.
“Pas takimit, Presidentja me delegacionin e saj do të priten në drekë zyrtare nga Kryeministri Rama. Presidentja po ashtu do të pritet në takim edhe nga Kryetarja e Kuvendit të Shqipërisë, Lindita Nikolla” – ka njoftuar Presidenca.
Në agjendën e Presidentes Osmani është thënë se është edhe një aktivitet i përbashkët i dy presidentëve me rastin e Ditës së Nënë Terezës në ekspozitën e Arkivave në Presidencën e Shqipërisë, e po ashtu, në Tiranë Osmani do të ketë edhe një takim me grupin e grave deputete, vizitë te Muzeu i Gjetheve dhe aktivitete të tjera.
“Në kuadër të kësaj vizite shtetërore, Presidentja Osmani në një ceremoni do t`ia dorëzojë dekretin e nënshtetësisë së Kosovës, shkrimtarit me famë botërore, Ismail Kadare. Agjenda do të vijojë në qytetin e Beratit, ku pas takimit me kryetarin e Bashkisë, Ervin Demo, Presidentes do t`i dhurohet titulli më i lartë i qytetit “Patroni i Kalasë”, e më pas do të vizitohen Kisha e Shën Mërisë dhe Muzeu Onufri” – thuhet në njoftim.
Më pas është thënë se në Durrës, Presidentja Osmani do ta ketë një takim me kryebashkiaken e Durrësit, Emiriana Sako, do ta vizitojë Torrën Veneciane dhe Zyrën Doganore të Kosovës në Portin e Durrësit.
