Kurti: Insistojmë në zbatim të plotë të secilit nen - pa kushte, të marrëveshjes me Serbinë - VIDEO
Kryeministri i Kosovës, Albin Kurti para gazetarëve ka treguar detaje rreth takimit të sotëm me Emisarin e Bashkimit Evropian për dialog, Mirosllav Lajçak.
Kurti tha se takimi sotëm ishte vazhdim i atij që ishte mbajtur javën e kaluar në Bruksel dhe se gjithashtu ishte edhe përgatitje për takimin që do të zhvillohet mes kryenegociatorëve javën e ardhshme.
“Takimi që u zhvillua sot me Lajçak është si vazhdim i takimit që u zhvillua në Bruksel dhe ishte përgatitje për takimin që do të zhvillohet mes kryenegociatorëve. Insistimi ynë është ajo çfarë jemi dakorduar, pra zbatim i plotë i secilit nen pa vonesa dhe pa kushte”- tha Kurti.
“Ne e dimë që pala tjetër ka bërë deklarata se marrëveshjen nuk e pranon me përmbajtje por vetëm me koncept dhe se zbatimi i saj ka kufizime. Këto për ne janë të pa pranueshme dhe ishte e rëndësishme që sot ta konfirmojmë me emisarin që marrëveshja është ajo me 11 nene në Bruksel dhe ajo me 12 pika në Ohër”- shtoi ai.
Kryeministri theksoi se është i interesuar që të bashkëpunojë në shkrimin e një vizioni për komunitetin serb në Kosovë sa i përket nivelit të vetë-menaxhimit.
“Jemi të interesuar që të bashkëpunojmë për të shkruar bashkë një vizion për komunitetin serb në Kosovë sa i përket nivelit adekuat të vetëmenaxhimit siç e sheh neni 7 i marrëveshjes së dakorduar, duke mos e anashkaluar nenin 10. Ky është synimi ynë paralelisht me atë që duhet të ketë zbatim të plotë dhe sa më të shpejtë“- u shpreh Kurti.
Kreu i ekzekutivit tha se Kosova është në rrugën e normalizimit teksa ritheksoi se marrëveshja bazike që sipas tij është realizuar, përbën njohje defacto.
“Kosova është në rrugën e normalizimit, në normalizim i plotë i cili arrihet pikërisht me njohjen reciproke në qendër ndërsa me marrëveshjen bazike që e kemi realizuar kemi njohje defacto”—deklaroi Kurti.
Ndërkaq, emisari i BE-së sot njoftoi se të hënën e javës së ardhshme do të takohet me kryenegociatorët, nga Kosova Besnik Bislimin dhe nga pala e Serbisë, Petar Petkoviqin.
“Do të takohem me kryenegociatorët, Bislimin dhe Petkoviq të hënën në Bruksel, pra kjo është shumë e rëndësishme që të kemi qartësi në atë se si të vazhdojmë, kemi marrëveshjen, kemi aneksin, kështu që duhet të kemi një kuptim të qartë të hapave”- deklaroi ai.
Lajçak më tej njoftoi se nesër do të ketë diskutime të njëjta edhe në Beograd.
Kjo vizitë vie pas takimit të 2 majit në Bruksel të mbajtur mes kryeministrit të Kosovës, Albin Kurti, dhe presidentit të Serbisë, Aleksandar Vuçiq.