Rrena se u dogj veriu i Kosovës

U DOGJ VERIU MBREME”, ESHTE DEGJUAR NJE SHPERTHIMI I FUQISHEM ATJE

Më 20 qershor 2023, faqja në Facebook “Vec me Albin Kurtin Kryeministër” e ka shpërndarë një artikull me titull “U DOGJ VERIU MBREME”, ESHTE DEGJUAR NJE SHPERTHIM I FUQISHEM ATJE” (arkiva).

I njëjti artikull është shpërndarë edhe në faqe tjera si: “Lajme1”, “Shqipëria Live Big”, “Post Lajme”, “Lajme Kosova”, “Day to Kosova”.

Përkundër që në titull thuhet se “u dogjë veriu”, brenda në artikull nuk është paraqitur asnjë fakt që e mbështet atë konstatim.

KALLXO.com ka kontaktuar me drejtorin e Policisë së Kosovës për rajonin e Mitrovicës, Veton Elshani.

Elshani ka thënë nuk ka pas “djegie të veriut”, si është raportuar në këtë portal.

Ai ka thënë se ka pasur vetëm një shpërthim me shok bombë, por e cila nuk ka shkaktuar dëme materiale.

“Në afërsi të stacionit policor në veri të Mitrovicës ka pasur një shok-bombë dhe një tjetër është dëgjuar në një pjesë tjetër. Nuk ka dëme, nuk ka lëndime. Policia është në veri, sipas koordinimeve me personelin e vet, të nevojshëm dhe të mjaftueshëm”– ka thënë zëdhënësi i policisë Veton Elshani.

Kryetari i Komunës së Mitrovicës Veriore, Erden Atiq, në një postim në Facebook, ka thënë se sulmi është bërë me qëllim të shkaktimit të frikës, por nuk ka njoftuar se ka pasë dëme materiale. 

Tensione në veri ka pasur që nga data 26 maj 2023, kur kryetarët e rinj të dalur nga zgjedhjet e mbajtura më 23 prill 2023, në katër komunat veriore (Mitrovicë të veriut, Leposaviq, Zveçan dhe Zubin Potok) u vendosën në objektet komunale.

Qyetarët serb nuk po i pranojnë kryetarët shqiptarë në këto komuna, të cilët kanë protestuar para objekteve të komunave. Disa prej protestave kanë qenë të dhunshme duke shkaktuar edhe lëndime të ushtarëve të KFOR-it dhe qytetarëve.

Komuniteti ndërkombëtar i ka bërë thirrje Kosovës dhe Serbisë që të marrin urgjentisht masa për uljen e tensioneve.