Rrena për aksident në Rrugën e Kombit 

Një aksident i rëndë trafiku ka ndodhur sonte në “Rrugën e Kombit”

Më 6 janar 2024 është faqja në Facebook “Live News” (arkive) është publikuar një lajm me mbishkrim “Një aksident i rëndë trafiku ka ndodhur sonte në “Rrugën e Kombit”, në tunelin e Kalimashit, ku dyshohet se kanë humbur jetën dy persona dhe 3 të tjerë kanë mbetur të lënduar. Të lënduarit janë dërguar në spital për të marrë ndihmën mjekësore”.

Në artikullin e publikuar më 6 janar 2024 thuhet se “aksidenti ka ndodhur sonte”. Për të konfirmuar këtë, Krypometër e ka vizituar faqen zyrtare të Policisë së Shqipërisë dhe postimet e bëra nga Policia e Shtetit në faqen e tyre në Facebook dhe rezulton se më datë 5 dhe 6 janar 2024 nuk është raportuar ndonjë aksident me dy persona të vdekur në tunelin e Kalimashit. 

Më pas, Krypometër ka verifikuar për aksidentet që kanë ndodhur në tunelin e Kalimashit gjatë muajëve të fundit. Krypometër, përmes kërkimeve në internet, ka gjetur se dy shtetas kosovarë kanë humbuar jetën në një aksident që kishte ndodhur në tunelin e Kalimashit më 18 tetor 2023 (arkive). 

Përmbajtja e lajmeve të publikuar më 18 tetor 2023 është e ngjashme me artikullin e shpërndarë më 6 janar 2024 në faqen në Facebook “Live News”.

Lajmin për aksidentin me dy të vdekur e kishte konfirmuar edhe Gent Mullai, zyrtar në Policinë e Shqipërisë, më 18 tetor 2023.

“Në lidhje me aksidentin e ndodhur në tunelin e Kalimashit, ku u përfshinë në një aksident rrugor automjetet tip “Benz” me drejtues shtetasin A. B., banues në Tropojë, automjeti tip “Ford”, me drejtues shtetasin I. L, banues në Kosovë, dhe autoboti me drejtues shtetasin Sh.S, banues në Kosovë, ju informojmë se shtetasit që kanë humbur jetën janë S.O, 58 vjeç, dhe N. O, 45 vjeç, banues në Kosovë, pasagjerë në automjetin tip “Ford”- ka bërë të ditur Mullai.