Materiali i fabrikuar për tubim të Lëvizjes Vetëvendosje në Graçanicë
Deklarata
Tubimi i Albin Kurtit në Graqanic!!
Vlerësimi
Rrenë
Videoja dhe përshkrimi i saj “Tubimi i Albin Kurtit në Graqanic!!” janë të rreme. Pamjet e paraqitura nuk janë nga tubimi i Vetëvendosjes në Graqanicë, por janë nga tubimi elektoral i kësaj partie në Han të Elezit. Zëdhënësi i Vetëvendosjes, Arlind Manxhuka ka thënë se përveç pamjeve edhe fjalimi që paraqitet në videon e faqes “Aleanca Ash” janë të fabrikuara.
Artikulli
Më 4 korrik 2020 në faqen në Facebook “Aleanca Ash” është publikuar një video me përshkrimin “Tubimi i Albin Kurtit në Graqanic!!”. Kjo video është shpërndarë 2,600 herë deri më tash, ndërsa në tre muajt e fundit është shpërndarë 326 herë.
Krypometri ka kontaktuar me zëdhënësin e Lëvizjes Vetëvendosjes, Arlind Manxhuka, i cili ka thënë se videoja në fjalë është e fabrikuar.
Ai ka thënë se Lëvizja Vetëvendosja nuk e ka mbajtur një tubim të tillë në Graçanicë dhe se pamjet janë marrë nga një tubim të mbajtur në Han të Elezit.
“Kjo video është montazh dhe kësisoj lajm i rremë mbi një tubim të LV-së në kuadër të zgjedhjeve lokale që është mbajtur në Han të Elezit”- ka thënë Mangjuka.
Krypometri ka gjetur se pamjet që janë përdorë në këtë video të shpërndarë nga faqja “Aleanca Ash” janë marrë nga tubimi i Lëvizjes Vetëvendosje në Han të Elezit për zgjedhjet lokale të 2013-es.
Manxhuka ka thënë se përveç pamjeve edhe fjalimi që paraqitet në videon e faqes “Aleanca Ash” janë të fabrikuara.
Në videon e faqes “Aleanca Ash” janë paraqitur disa pamje që tregojnë flamuj të Serbisë në një sallë, por ato pamje nuk janë nga tubimi i Lëvizjes Vetëvendosje në Han të Elezit.