Naser Osmani në Gjykatë, se kam tejkaluar asnjë autorizim ligjor

Në Gjykatën Themelore në Prishtinë,  është duke vazhduar gjykimi ndaj deputetit të Kuvendit të Kosovës nga radhët e LDK-së, Naser Osmani dhe shtatë të akuzuarve të tjerëve, gjykim ky i cili lidhet me privatizimin e fabrikës “FAN” në Podujevë.

Mbrojtjen e ka dhënë i akuzuari Naser Osmani i cili është përgjigjur në pyetjet e mbrojtësit të tij, avokatit Besnik Berisha pastaj prokurores speciale Fikrije Fejzullahu si dhe trupit gjykues.

Avokati Berisha, të akuzuarin Naser Osmani ndër të tjera e ka pyetur se cilat kanë qenë detyrat që ai ka qenë i detyruar të i marrë në lidhje me rastin e datës 20 janar të vitit 2012 në lidhje me lirimin nga monitorimi të ndërmarrjes “FAN” si dhe për lirimin e disa aseteve të asaj ndërmarrje? Pasi që sipas avokatit në aktakuzë thuhet se Naser Osmani në atë rast i ka tejkaluar kompetencat zyrtare me qëllim të përfitimit të dobisë për vete apo për ndonjë person tjetër.

Për çka Osmani ka thënë se ai asnjëherë nuk i ka tejkaluar kompetencat e tij.

“Unë e kam përmbush të drejtën time ligjore për të dhënë një mendim për çështjen në fjalë duke marr parasysh të gjitha rrethanat”, tha Naser Osmani, i cili shtoi se ai dhe gjashtë anëtarët e Bordit, kanë votuar për lirimin e fabrikës “FAN”, përpos Haxhi Arifit, i cili ishte kryetar i Bashkimit të Sindikatave të Pavarura të Kosovës.

Ndërsa sa i përket pretendimeve të prokurorisë se Naser Osmani ka ndikuar tek anëtarët e Bordit që të votonin për ta liruar fabrikën “FAN” nga monitorimi, Osmani i ka mohuar këto pretendime të prokurorisë me arsyetimin se secili anëtar i bordit e ka pasur mendimin e vet, e sa i përket anëtarëve të tjerë ndërkombëtar tha se ai nuk ka komunikuar me ta pasi që nuk e di gjuhën angleze.

Për lirimin e fabrikës nga monitorimi, ai tha se kjo ka qenë kërkesë e blerësit dhe se këtë proces e kishte monitoruar edhe Zyra Ndërlidhëse e Këshillit të Evropës.

Në këtë rast gjyqësor, Naser Osmani bashkë me 7 persona të tjerë po gjykohen në lidhje me privatizimin e fabrikës “Fan” në Podujevë.

Në kohën për të cilën akuzohet, deputeti Osmani ka qenë anëtar i Bordit të Agjencisë Kosovare të Privatizimit.

Përveç tij, pjesë e gjykimit janë edhe Bahri Shabani, Melita Ymeraga, Shkëlzen Lluka, Naim Avdiu, dhe Adrian Kelmendi (të gjithë zyrtarë të AKP-së), si dhe Agim Deshishku si blerës i fabrikës “Fan”.

KALLXO.com e ka përcjellë në vazhdimësi këtë proces.

Raportet mund t’i gjeni në këtë link.

Shkrimi është edituar në njerin na emrat e të akuzuarve A.K për të cilin prokuroria është tërhjekur nga aktakuza.