LDK: Shqetësuese dyshimet e Auditorit për keqpërdorimin e mbi 800 mijë eurove
Lidhja Demokratike e Kosovës (LDK), ka mbajtur konferencë për media në të cilën shefi i grupit parlamentar njëherësh edhe anëtari i Komisionit për mbikëqyrje të financave publike, Avdullah Hoti ka folur për gjetjet e Auditorit për Zyrën e Kryeministrit.
Sipas Hotit, është shqetësuese sesi qeveria Haradinaj abuzon me buxhetin e shtetit përmes subvencioneve.
“Sot do të adresoj një çështje shqetësuese për mënyrën sesi Qeveria e Kosovës po abuzon me buxhetin e shtetit tash përmes subvencioneve. Nga 1.7 milion sa kanë qenë në vitin 2017 buxheti për subvencione është trefishu në 3.6 milionë”, tha Hoti.
Hoti nuk la pa përmendur edhe dyshimet e Auditorit për keqpërdorimin e buxhetit përmes OJQ-ve.
“Ndarja e mjeteve auditori gjen se është bërë me plot shkelje. Shkelja e parë është që janë anashkaluar procedurat për subvencionim të OJQ-ve që janë të parapara me rregullore. Shkelja e dytë edhe pasi janë nda mjetet nuk është nënshkruar kontrata mes zyrës dhe kësaj OJQ-je, e cila kontratë duhet të parashihte aktivitetet që do të mbaheshin, për këto mjete që janë ndarë është paraparë që në fakt Ministria e Mjedisit të merret me planifikimin e mjeteve në aspektin logjistik dhe financiar. Në fakt Zyra e Kryeministrit është marrë më të gjitha çështjet”, tha ai.
Sipas tij organizata ‘Let’s do It Kosova’ ka marrë edhe një subvencion tjetër nga Zyra për Komunitete e për të cilin nuk ka bërë ndonjë aktivitet.
“Të gjitha pagesat që arrijnë në mbi 800 mijë euro janë bërë nga faturat e kësaj OJQ-je, nuk ka asnjë raport për punët e kryera nga kjo OJQ. Për të njëjtin projekt, e njëjta OJQ ka marrë edhe 30.000 mijë euro nga Zyra për Komunitete në kuadër të Zyrës së Kryeministrit dhe ka marrë këto para për projektin ‘Mbrojtja dhe promovimi i të drejtave dhe interesave të komuniteteve’ ndërkaq aktivitete që ka kryer janë të njëjtat me aktivitete që i përmenda pak më herët, Ta pastrojmë Kosovën”, tha Hoti.
Hoti e konsideroi shumë shqetësues edhe faktin e një OJQ ka përfituar dy subvencione nga e njëjta OJQ nga institucione të ndryshme, nga kuvendi, qeveria ose nga ministritë përkatëse.
Shefi i grupit parlamentar të LDK-së, paralajmëroi që shkeljet që ka gjetur raporti i auditorit do të diskutohen nga Komisioni Parlamentar për Mbikëqyrjen e Financave Publike.
“Ky raport nuk do të mbetet me kaq, ky raport do të shqyrtohet në komisionin për mbikëqyrje të financave dhe eventualisht në mbledhjet e ardhshme do të shkojë edhe në kuvend që të merren me keqpërdorime milionëshe të financave”, theksoi Hoti.
Mirëpo Zyra Kombëtare e Auditimit (ZKA), në analizimin e pasqyrave financiare të Zyrës së Kryeministrit kanë se thënë nuk janë në gjendje të konfirmojnë nëse fondet në vlerë prej 815,035€ të cilat qeveria e Kosovës i ka ndarë për themelimin e Task Forcës për pastrimin ne ambientit në Kosovë janë shpenzuar në mënyrë të rregullte dhe në përputhje me ligjin.
I kontaktuar ditë më parë nga KALLXO.com, drejtori i organizatës Let’s do It Kosova, Luan Hasanaj, ka thënë se puna është bërë në mënyrë korrekte dhe transparente.
“Ne kemi m’e kërku përgjigje prej Auditorit, me e pa se ku janë këto probleme. Ne e kemi një vendim Qeverie i cili e ka aprovuar kërkesën tonë, fillimisht për krijimin e Task Forcës për pastrimin e Kosovës në të cilin kanë marrë pjesë shumë ministri, shumë institucione tjera, mandej kjo Task Forcë ka qenë ajo e cila i ka aprovuar të gjitha raportet, kërkesat të cilat kanë dalë si rrjedhojë e takimeve që janë mbajtë për pastrimin e Kosovës”, ka thënë Hasanaj.
https://kallxo.com/dyshimet-per-parregullsi-ne-fushaten-per-pastrim-qeveria-nuk-i-konteston-gjetjet-hasanaj-ka-dyshime/
.