Kujdes: Policia ashpërson gjobat për makinat në gjendje jo të mirë

Policia e Kosovës ka njoftuar se po vazhdon me aktivitete që kanë për qëllim ngritjen e vazhdueshme të sigurisë në trafikun rrugor si dhe uljen e aksidenteve.

Sipas komunikatës, njësitë policore, përveç pikave të kontrollit të automjeteve apo patrullimeve në lëvizje, janë duke u përqendruar në identifikimin dhe ndëshkimin e kundërvajtësve të cilët rrezikojnë sigurinë në trafikun rrugor.

“Vetëm në muajin mars 2019 gjatë implementimit të planit ‘Kontrolli teknik i jashtëzakonshëm’, nga njësitë policore janë shqiptuar gjithsej 290 fletëparaqitje për kundërvajtje, për të cilat është konstatuar se mjetet janë teknikisht jo në rregull”, bën të ditur policia.

PK shton se kujdesi maksimal i pjesëmarrësve në trafik, posaçërisht i drejtuesve të automjeteve është i domosdoshëm për të shmangur aksidentet fatale dhe në këtë mënyrë të krijohet një siguri më e madhe në trafikun rrugor.

“Po ashtu, ju njoftojmë se Policia e Kosovës në kuadër të fushëveprimit të saj ligjor që ka, do të aplikoj masa rigoroze ndëshkuese ndaj të gjithë shkelësve të ligjit të trafikut, me të vetmin qëllim për ngritjen e nivelit të sigurisë në trafik dhe parandalimin e aksidenteve rrugore në përgjithësi”, thuhet në komunikatë.

Paralajmërimet e policisë, vijnë pas një numri të konsiderueshmë të aksidenteve që kanë ndodhur në Kosovë, kohëve të fundit, e sidomos ato me fatalitet.

https://kallxo.com/rruget-vdekjeprurese-te-kosoves/