Gjykata Themelore e Prishtinës - Foto: KALLXO.com
Rrëfehet në gjykatë invalidi ushtarak që po akuzohet se bleu banesë me para të fituara nga droga
Kanë kaluar thuajse dy vjet qëkur Gjykata e Prishtinës i dënoi me gjobë e burg Shahadin e Sefer Hasanin duke i shpallur fajtorë për veprën penale posedim të narkotikëve.
Të njëjtit sot përsëri janë sjellë para Gjykatës mirëpo tash me akuzat se kishin blerë banesa me paratë e fituara nga aktiviteti kriminal me narkotikë.
Shahadini deklaroi se për veprën që e ka bërë ishte dënuar dhe kishte paguar dënimin.
“Veprën që e kam bërë më kanë dënuar, e kam vuajtur dënimin, e kam paguar 20,000 euro dënimin”, tha ai.
Gjatë seancës së sotme që të akuzuarit dy u deklaruan të pafajshëm.
“Nuk është e vërtetë, unë banesën e kam blerë 3 vite më herët, nuk e pranoj që e kam blerë banesën me para të kundërligjshme. Nëse e kisha blerë banesën me para të kundërligjshme nuk e kisha qitë në emër timin”, tha Shahedin Hasani.
Gjatë seancës ai deklaroi se kishte probleme me dëgjimin sepse ishte invalid ushtarak ngase kishte marrë pjesë në tri luftëra.
Shahedin e Sefer Hasanin prokuroria i vë në barrë veprën penale të shpëlarjes së parave.
Në bazë të aktakuzës, prokuroria po i akuzon Shahedin e Sefer Hasanin kanë blerë banesa me qëllim që të fshehin pasurinë e fituar në mënyrë të kundërligjshme përmes aktiviteteve kriminale me narkotikë dhe të bëjnë atë pasuri të duket si e ligjshme. Banesat e blera nga të akuzuarit sipas prokurorisë kishin vlerat 59.6000,00 euro dhe 44.070,00 euro.
Kallxo.com ka raportuar edhe më parë për arrestimin e të akuzuarve.