'Nuk ia kam pa fytyrën...ka gjujt 6-7 herë' - Rrëfimi i nxënëses në gjykimin për vrasjen e trefishtë në Gllogjan

Halil, Kreshnik e Kastriot Mehmetaj, të akuzuar për vrasjen e trefishtë në Gllogjan sot u përballën para Gjykatës së Pejës me dëshminë e dëshmitares Andina Bajramaj, nxënëses që kishte qenë prezente në autobusin e sulmuar.

Rasti kishte ndodhur në mbrëmjen e 26 nëntorit të vitit 2021, kur autobusi “Erblini” me nxënës në të, ishte sulmuar me armë “Kallashnikov” , e nga sulmi ishin vrarë 2 nxënës të moshës 17 vjeçare L.H. dhe G.M. dhe shoferi i autobusit G.Gj.

Dëshmitarja tha para gjykatës se në autobus kishte qenë ulur pas të ndjerës G.M. dhe nuk kishte arritur të kishte pamje më shumë nga flakët e “Kallashit.”

Ajo dha edhe një përshkrim të veshmbathjes së sulmuesit, për të cilin tha se kishte pasur jakne të gjatë të zezë, çizme të gjata deri në gju dhe një kapelë.

Ajo tha se kapela ia kishte mbuluar gjysmën e fytyrës sulmuesit dhe kështu nuk kishte arritur t’ia shihte fytyrën.

Detaje mbi veshmbathjen e sulmuesit, kishin dhënë edhe dy nxënës tjerë që ishin dëgjuar në këtë gjykim.

Sot Bajramaj para gjykatës përshkroi edhe detaje se si kishte parë sulmuesin të ectë “si në gjendje të dehur” dhe i kishte dalë me shpinë autobusit, kurse ishte kthyer kishte shtënë përpara tij dhe pastaj kishte shtënë edhe “kah dritarja e shoferit”.

“Pasi e kemi kaluar shkollën fillore në Gllogjan në mes të rrugës ka qenë një njeri duke ecur. Shoferi është mundu me lajmëru me u largu nga rruga, ai person është dukur i dehur dhe nuk është largu…Ai person është kthyer dhe ka gju në drejtim të autobusit. Pasi ka gju në drejtim të autobusit është ndalë dhe ka kalu te dritarja e shoferit ku ka gjuajtur dhe aty dhe pastaj ai person është largu” – rrëfeu dëshmitarja.

Dëshminë e saj u mundua ta ndalë prindi i saj, duke i thënë gjykatës se i kanë deklaratat e saj në polici dhe prokurori duke i’u drejtuar me fjalët “Ndërpreje, ndërpreje (deklaratën)”.

Prindi i saj u largua nga salla me urdhër të gjyqtares Violeta Husaj-Rugova.

Demë Hasanaj i tha gjykatës se kjo ndërhyrje ndikon në gjendjen e saj psiologjike, kurse gjyqtarja i’u drejtua të njëjtit me fjalët “A je psikolog ti a?”.

Përkundër kësaj ndërhyrjeje, dëshmitarja vazhdoi dëshminë e saj duke treguar se kanë qenë 6-7 të shtëna ditën e sulmit dhe se dëshminë e saj në polici të dhënë menjëherë një ditë pas ngjarjes kritike ka qenë në gjendje jo të mirë emocionale, kurse pas kalimit të kohës i janë kujtuar detajet e rastit më mirë.

Cili është motivi i vrasjes sipas Prokurorisë?

Kjo vrasje dyshohet se është bërë për qëllime hakmarrëse ndaj shoferit G.Gj., duke e lidhur këtë vrasje me vetëvrasjen e H.M. në vitin 2020, e cila ishte bija e të akuzuarit Halil Mehmetaj.

Sipas Prokurorisë, për këtë vetëvrasje që kishte ndodhur në familjen Mehmetaj, këta të fundit e kishin fajësuar shoferin G.Gj, i cili u vra në sulmin kundër autobusit.

Edhe gruaja e shoferit të nderjë kishte dhënë dëshminë e saj, por seanca ishte mbyllur për publikun për shkak të ndjeshmërisë së rastit.

Halil Mehmetaj, sipas Prokurorisë është betuar për hakmarrje tek varri i vajzës së tij kur e ka varrosur, duke vënë orën e dorës së tij në arkivolin e vajzës.

Sipas dosjes, Kreshnik e Kastriot Mehmetaj kishin planifikuar vrasjen dhe kishin ndarë detyrat, për mënyrën dhe kohën e kryerjes së vrasjes, kurse babai tyre i kishte shtyrë në këto veprime.

Asnjëri nga të akuzuarit nuk e ka pranuar fajësinë për këtë.

Në këtë gjykim janë dëgjuar rrëfimet e prindërve të nxënësve të vrarë në natën kritike.

Beqë Hamzaj dhe Florim Mustafaj kanë dhënë rrëfimet e tyre për ngjarjen në të cilën u vranë fëmijët e tyre 17-vjeçarë.

Lidhur me hakmarrjen në fjalë, për të cilën Prokuroria po dyshon si është motivi i vrasjes, Beqë Hamzaj kishte thënë se vrasja e fëmijëve ishte bërë për ta mbuluar hakmarrjen.

Mbrojtja e të akuzuarve këtë motiv e kishte cilësuar si hetim të gabuar e veprime të ngutshme, duke u bazuar sipas tyre në spekulime dhe thashetheme të fshatit, të cilat e kanë orientuar gabimisht Prokurorinë në ndriçimin e rastit.

Aktakuza e ngritur nga Prokuroria e Pejës ishte bërë publike përmes një konference nga ky institucion, ku ishin shpalosur detaje mbi veprimet hetimore të ndërmarra.

Ngjarja e ndodhur në Gllogjan ishte konsideruar tronditëse edhe për opinionin publik.

Arrestimi i të akuzuarve kishte ndodhur vetëm disa ditë pas ngjarjes së rëndë.

Mbi Kreshnik dhe Kastriot Mehmetajn rëndojnë akuzat për vrasje të rëndë, ndërsa Halil Mehmetaj akuzohet për shtytje në vrasje të rëndë,

Akuza përfaqësohet nga prokurorja Sahide Gashi.

Ky rast gjykohet nga trupi gjykues i përbërë nga Violeta Husaj- Rugova, Shaqë Curri dhe Leon Përlaska.