Gjykata Speciale ia vazhdon paraburgimin Hashim Thaçit

Trupi gjykues për rastin e ish-krerëve të UÇK-së që po gjykohen në Hagë, ka vendosur që Hashim Thaçit t’i vazhdohet paraburgimi.

Gjykata Speciale argumenton se paraburgimi i Thaçit mbetet proporcional duke iu referuar gjetjeve të mëparshme të panelit dhe rikujton se arsyeshmëria e vazhdimit të paraburgimit të të akuzuarit Thaçi duhet të vlerësohet në bazë të fakteve të secilit rast dhe sipas veçorive të tij të veçanta.

Sipas këtij paneli, disa nga karakteristikat e veçanta në këtë rast përfshijnë ndikimin dhe autoritetin të Thaçit, njohuritë e tij për akuzat dhe provat kundër tij, rreziku që Thaçi do të pengonte procedurat, rrezikun e kryerjes, nxitjes ose ndihmës për krime të mëtejshme, peshën dhe kompleksitetin e akuzave kundër Thaçit si dhe fakti që ky proces gjyqësor është duke u zhvilluar momentalisht, duke demonstruar edhe një progres të arsyeshëm të procedures.

Palët janë urdhëruar që të gjitha parashtresat në lidhje me rishikimin tjetër të paraburgimit të dërgohen deri më datën 28 korrik të vitit 2023.

Seanca e së martës në gjykimin ndaj Thaçit dhe të tjerëve ka vazhduar me dëgjimin e dëshmitarit të njëmbëdhjetë, i identifikuar me kodin 03811. Zyra e Prokurorit të Specializuar ka vazhduar me marrjen në pyetje të këtij dëshmitari.

Kryetari i trupit gjykues, gjykatësi Charles Smith paraprakisht theksoi se ekipet e mbrojtjes e kanë shkurtuar kohën e marrjes në pyetje në më pak se dy orë për këtë dëshmitar.

Të gjithë të akuzuarit e tjerë janë të pranishëm në shqyrtimin gjyqësor përveç Jakup Krasniqit, i cili është duke e përcjellë seancën përmes video-lidhjes.

Seanca po vazhdon e mbyllur për publikun.

Gjyqi ndaj ish-krerëve të UÇK-së filloi më 3 prill 2023, dy vjet pas arrestimit dhe dërgimit të tyre në Hagë.

Hashim Thaçi, Kadri Veseli, Rexhep Selimi dhe Jakup Krasniqi po akuzohen për krime lufte dhe krime kundër njerëzimit.

Aktakuza fillestare kundër katër të akuzuarve u konfirmua më 26 tetor 2020 dhe ka pësuar disa ndryshime në vitet që kanë pasuar. Aktakuza aktualisht në fuqi u dorëzua më 27 shkurt 2023.

Secili prej të akuzuarve është akuzuar mbi bazën e përgjegjësisë penale individuale me gjashtë akuza për krime kundër njerëzimit: përndjekje, burgim, akte të tjera çnjerëzore, torturë, vrasje e paligjshme dhe zhdukje me forcë e personave.

Gjithashtu kundër tyre janë ngritur edhe pretendime për krime lufte: arrestim dhe ndalim i paligjshëm dhe arbitrar, trajtim mizor, torturë dhe vrasje e paligjshme.

Sipas aktakuzës, krimet e paraqitura u kryen më së paku prej marsit 1998 deri në shtator 1999 në disa vendndodhje në Kosovë, si dhe në Kukës dhe Cahan të Shqipërisë.

Pretendohet se këto krime u kryen nga anëtarë të UÇK-së kundër qindra civilëve dhe personave që nuk merrnin pjesë në luftime.
Deri tani, 140 persona janë pranuar si viktima pjesëmarrëse në procesin gjyqësor.

Ata janë vetëdeklaruar të pafajshëm për akuzat në fjalë.

Raportimet e tjera të KALLXO.com lidhur me këtë rast mund t’i lexoni në këtë LINK.