Foto: KALLXO.com
Gjakovë, afër fundit gjykimi i dy policëve
Në gjykimin për keqpërdorim të detyrës zyrtare ndaj dy policëve, Ismet Deva dhe Bit Shala, sot është përmirësuar një pjesë e aktakuzës.
Dy policët doganorë po akuzohen se në pikën kufitare Qafë-Prush, duke mos i regjistruar kishin lejuar hyrjen e mallrave komerciale në vlerë prej 564.60 euro.
Para se të jepej fjala përfundimtare, prokurori Ali Uka tha se vlera e shumës me të cilën është dëmtuar buxheti i Kosovës duhet të jetë 168.25 euro, e jo 564.60 euro siç cekej fillimisht në aktakuzë.
“Kjo shumë është vërtetuar edhe nga ana e Doganës”, tha prokurori Uka.
Prokurori Ali Uka, sot kërkoi nga Gjykata e Gjakovës që të akuzuarit të dënohen sipas ligjit, duke marrë parasysh të gjitha rrethanat rënduese dhe lehtësuese.
I akuzuari Ismet Deva i tha disa fjalë në Gjykatë.
“Gjatë kësaj periudhe ne kemi pasur dëme të mjaftueshme, sikurse dëme materiale e shpirtërore. Sepse nga periudha 6 mujore sa kemi qenë të suspenduar, kemi humbur 2.050 euro pa u bërë asnjë hetim nga IPK-ja. Në këtë periudhë kemi qenë të shënjestruar nga të gjitha anët. Unë kam fituar sëmundjen e diabetit. Falënderoj trupin gjykues për korrektësinë dhe shpresoj që të tillë do të jenë deri në përfundim”, deklaroi i akuzuari Ismet Deva.
Ndërsa i akuzuari Bit Shala u pajtua me avokatin e tij Genc Juniku, që aktakuza e Prokurorisë duhet të hidhet poshtë si e pabazuar.
Për këtë rast shpallja e aktgjykimit do të bëhet me datën 17 tetor.
Seancën e kaluar dy të akuzuarit kishin dhënë mbrojtjen e tyre.
Dy zyrtarët policorë Ismet Deva dhe Bit Shala, po akuzohen nga Prokuroria se kishin lejuar kalimin e dy veturave me mallra komerciale, të dy personave Bajram Gjoka dhe Muhamet Tahiri, pa regjistrimin e tyre, me dëm të shkaktuar në vlerë prej 564.60 euro.
Në këtë pikë kufitare, Prokuroria pretendon se personat Bajram Gjoka dhe Muhamet Tahiri në orën 18:00 deri në ora 18:30, kanë qenë në pikën kufitare duke pritur që të kalojnë kufirin.
Një seancë kishte dështuar si pasojë e mungesës së përfaqësuesit ligjor të Doganës së Kosovës.
Në këtë rast është dëgjuar udhëheqësi i kalimit kufitar Qafë-Morinë, bashkë me dy dëshmitarë të tjerë, Bajram Gjoka dhe Muhamet Tahiri.
Dy zyrtarët policorë Ismet Deva dhe Bit Shala po akuzohen nga Prokuroria për veprën penale të keqpërdorimit të pozitës së tyre zyrtare, duke lejuar kalimin e mallrave pa regjistrimin e tyre.
Në muajin maj, policët kishin kundërshtuan aktakuzën e Prokurorisë duke kërkuar që të hidhet si e pabazuar.
Prokuroria thotë se këto veprime kanë ndodhur në prill të vitit 2018.
Sipas aktakuzës, dy zyrtarët policorë kishin lejuar që dy veturat e personave Bajram Gjoka dhe Muhamet Tahiri, të ngarkuara me mallra komerciale të hynin në territorin e Kosovës, duke mos i regjistruar ato në sistemin SIMS.
Në aktakuzë thuhet se veturën e parë të ngarkuar me perime, fruta të ndryshme e fidane të vogla, e drejtonte Muhamet Tahiri, ndërsa veturën e dytë i cili kishte 40 kuti me dredhëza, e drejtonte Bajram Gjoka.
Gjithnjë sipas aktakuzës, në atë kohë dhe në atë pikë kalimi kufitar nuk kishte oficer doganor si kompetent për të vlerësuar dhe lejuar hyrjen e mallrave.
Mirëpo, këto mallra janë lejuar që të hynin nga Republika e Shqipërisë në Republikën e Kosovës, duke i shkaktuar shtetit të Kosovës dëm material në shumë prej 564.60 euro.
Kallxo.com ka raportuar edhe më herët për këtë rast.
https://kallxo.com/gjakove-policet-akuzohen-per-40-pako-dredheza/
