Të paktën shtatë të vdekur nga përmbytjet në Greqi, Turqi dhe Bullgari

Stuhi të ashpra shiu e kanë goditur Greqinë, Turqinë dhe Bullgarinë të martën, duke shkaktuar përmbytje që rezultuan me të paktën shtatë të vdekur, duke përfshirë dy pushues në një kamping në Turqinë veriperëndimore.

Ministri i Brendshëm turk Ali Yerlikaya tha se katër persona të tjerë rezultojnë të zhdukur pasi përmbytja e madhe përfshiu kampin në provincën Kirklareli, pranë kufirit me Bullgarinë. Ai tha se rreth 12 pushues ishin në atë rajon kur ndodhi vërshimi.

Ekipet e kërkimit kanë gjetur dy trupa, deklaroi ministri i brendshem turk përmes paltformës sociale X. “Përpjekjet e kërkim-shpëtimit për të zhdukurit (katër) vazhdojnë pa ndërprerje”, shtoi ai.

Në Stamboll, qyteti më i madh i Turqisë, shiu i madh përmbyti rrugët dhe shtëpitë në dy lagje, duke lënë të paktën dy të vdekur, sipas një deklarate nga zyra e guvernatorit. Rreth një duzinë njerëz u shpëtuan pasi u bllokuan brenda një biblioteke, ndërsa disa stacione metroje u mbyllën. Guvernatori i Stambollit Davut Gul u kërkoi ngasësve të automjeteve të qëndrojnë në shtëpi.

policia ndaloi trafikun në qytetin qendror të Volos, rajonin e afërt malor të Pilion dhe ishullin turistik të Skiathos pasi reshjet rekord shkaktuan të paktën një vdekje, kanalizuan përrenj të lartë nëpër rrugë dhe fshinë automjetet përpara.

Departamenti i zjarrfikësve tha se një burrë u vra pranë Volos kur një mur ra mbi të. Pesë persona u raportuan të zhdukur, të cilët ndoshta janë marrë me vete nga përmbytjet.

Autoritetet greke dërguan alarme celulare në disa zona të tjera të Greqisë qendrore, në zinxhirin e ishujve Sporades dhe në ishullin Evia duke paralajmëruar njerëzit që t’i kufizojnë lëvizjet e tyre jashtë.

Përrenjtë kanë dalë nga brigjet e tyre dhe i kanë futur automjetet në det në zonën e Pilionit, ndërsa rënia e gurëve i ka bllokuar rrugët, një urë e vogël është vërshuar dhe shumë zona kanë pësuar ndërprerje të energjisë elektrike. Autoritetet evakuuan një shtëpi të të moshuarve në qytetin e Volos si një masë paraprake.

Shërbimi i motit i Greqisë tha se një fshat i rajonit të Pilion pati 75.4 centimetra shi të martën vonë, deri tani niveli më i lartë i regjistruar që nga viti 2006. Ai vuri në dukje se reshjet mesatare vjetore në rajonin e Athinës janë rreth 40 centimetra .

Ministri i krizës klimatike dhe mbrojtjes civile të vendit, Vassilis Kikilias, tha se shiu i madh pritet të zbutet pas mesditës së të mërkurës. Ai këshilloi njerëzit në zonat e prekura të qëndrojnë brenda shtëpive të tyre.

Kjo stuhi vjen pas zjarreve të mëdha të verës që goditën Greqinë gjatë javëve të fundit, me disa djegie për më shumë se dy javë dhe duke shkatërruar sipërfaqe të mëdha pyjesh dhe tokash bujqësore. Më shumë se 20 njerëz kanë mbetur të vdekur nga zjarret.

Më në veri në Bullgari, kryeministri Nikolai Denkov ka deklaruar se dy persona humbën jetën dhe tre të tjerë rezultuan të zhdukur pasi një stuhi shkaktoi përmbytje në bregun jugor të Detit të Zi të vendit.

Lumenjtë e vërshuar kanë shkaktuar dëme të mëdha në rrugë dhe ura. Zona gjithashtu pësoi ndërprerje të energjisë elektrike dhe autoritetet paralajmëruan banorët që të mos pinin ujë rubineti për shkak të ndotjes nga ujërat e përmbytjeve.

Erërat e forta dërguan valë 2 metra që përplaseshin në plazhet në vendpushimet turistike mes shiut të rrëmbyeshëm që përmbyti rrugë dhe shtëpi.

Pamjet televizive treguan automjete dhe furgona kampere që u hodhën në det në qytetin turistik jugor më të goditur të Tsarevo. Autoritetet shpallën gjendjen e jashtëzakonshme në Tsarevo dhe u kërkuan njerëzve të lëviznin lart pasi katet përdhese të disa hoteleve ishin përmbytur./France24

Përgatiti: Nuhi Shala