Sulmi i grupeve terroriste në Banjskë, reagon qeveria e Kroacisë
Ministria e Punëve të Jashtme e Kroacisë ka dënuar sulmin e sotëm drejt policisë së Kosovës në Banjskë të Zveçanit, ku një zyrtar policor mbeti i vdekur dhe dy të plagosur.
Përmes rrjetit Twitter, Ministria e Punëve të Jashtme të Kroacisë ka bërë thirrje që autorët të sillen urgjentisht para drejtësisë.
“Dënojmë fuqishëm sulmin e dhunshëm ndaj policisë së Kosovës herët në mëngjes. Ngushëllimet tona të përzemërta familjes së policit të vrarë gjatë kryerjes së detyrës dhe shërim të shpejtë për efektivin e plagosur. Autorët duhet të sillen urgjentisht para drejtësisë”- thuhet në njoftim.
We strongly condemn violent attack on #Kosovo police early this morning. Our heartfelt condolences to the family of the police officer killed while performing duty and swift recovery to the injured officer. Perpertrators must urgently be brought to justice.
— MVEP/MFEA 🇭🇷 (@MVEP_hr) September 24, 2023
Një pjesëtar i Policisë së Kosovës u vra, një u plagos dhe një tjetër u lëndua, pas një sulmi nga persona të armatosur në Banjskë të Zveçanit, rreth orës 3 të mëngjesit të së dielës.
Policia e Kosovës ka rrethuar të dyshuarit, rreth 30 persona – pjesëtarë të grupit të armatosur terrorist që gjenden në manastirin e Banjskës, derisa sulmet ndaj njësiteve policore po vazhdojnë.
Organet e rendit konfirmuan se tre sulmues janë vrarë dhe një tjetër i uniformuar dhe i armatosur është arrestuar.
Kryeministri i Kosovës, Albin Kurti tha se sulmi u krye nga banda kriminale e terroriste të Serbisë.
Prokuroria Speciale e Kosovës deklaroi se rasti po trajtohet si sulm ndaj rendit kushtetues, ku hynë edhe terrorizmi.