Kosova dhe Shqipëria premtojnë ndarjen e çmimeve të përbashkëta vjetore në kinematografi

Kosova dhe Shqipëria kanë rënë dakord që të ndajnë çdo vit çmime të përbashkëta kombëtare në fushën e kinematografisë.

Qendra Kinematografike e Kosovës përmes një njoftimi ka bërë të ditur se sot në Tiranë, në mbledhjen e të dy qeverive, ministrja e Kulturës, Rinisë dhe Sportit, Vlora Dumoshi dhe ministrja e Kulturës e Shqipërisë, Elva Margariti, nënshkruan marrëveshjen që përcakton bashkëprodhimin filmik në mes të Kosovës dhe Shqipërisë.

“Kjo marrëveshje do të intensifikojë bashkëpunimin ndërmjet dy institucioneve filmike, Qendrës Kinematografike të Kosovës dhe Qendrës Kombëtare të Kinematografisë së Shqipërisë në bashkëprodhimin e filmave.  Marrëveshja parasheh edhe ndarjen e çmimeve vjetore kombëtare të përbashkëta në fushën e kinematografisë ceremonitë e të cilave pritet të ndodhin njërin vit në Tiranë dhe tjetrin në Prishtinë. Procedurat për ndarjen e çmimeve kombëtare për kinematografi do të bëhen me një rregullore të veçantë”, thuhet në njoftimin  e QKK-së.

Po ashtu, sipas QKK-së, kjo marrëveshje parasheh promovimin e ndërsjellë të filmave nga të dyja vendet, promovimin ndërkombëtar të përbashkët, si dhe e bën edhe inicimin e themelimit të fondit të përbashkët për kinematografi që do t’i shërbente bashkëprodhimit në mes të dy vendeve si interes kombëtar.