Hoxha: Grupi terrorist kishte predha të prodhuara në Serbi më 2023

Drejtori i Policisë së Kosovës, Gazmend Hoxha, ka prezantuar në foto armët që janë konfiskuar nga Policia nga grupi terrorist që kreu sulm më 24 shtator 2023 në Banjskë të Zveçanit.

Duke ndërlidhur përfshirjen e shtetit serb në krejt atë që ndodhi në Banjskë, drejtori Hoxha përmendi faktin se në mesin e armëve ka edhe predha të prodhuara në vitin 2023 në Serbi, e të cilat, sipas tij, nuk mund të gjenden në tregun e zi.

“Predhat janë të prodhuara më 2023 në Serbi, është mitralozi 30mm, i cili është për qëllim të sulmit të këmbësorisë dhe mjeteve të blinduara” – tha ai.

Tutje Hoxha shtoi se armët janë pajisje ushtarake që u gjetën e në mesin e tyre ka edhe lloje të armëve që u përdorën në sulmin që u vra polici Afrim Bunjaku.

“Kjo është minë që është përdorur me teledirigjim në sulm ndaj kolegut tonë, policit të Kosovës, Afrim Bunjaku. Humbja e jetës e kolegut tonë ka ndodhur nga sulmi i parë me detonim nga kjo lloj mine” – tha ai.

Hoxha tha se armët u gjetën gjithandej, përreth manastirit, në manastir, në shtëpitë përreth dhe në një objekt që është për mysafirët e manastirit.

Më 24 shtator 2023 një sulm terrorist u krye në Banjskë të Zveçanit.

Afrim Bunjaku, rreshter i Policisë së Kosovës, u vra, një polic tjetër u plagos e një tjetër u lëndua nga ky sulm, ndërsa Policia u sulmua disa herë radhazi nga grupi terrorist deri sa këta të fundit ikën në drejtim të Serbisë.

Në ditën kritike Policia sekuestroi 24 automjete, dy autoblinda e arsenal të madh armatimi luftarak që i kishte grupi terrorist.

Sekuestrimi i armëve të tjera po vazhdon që nga 24 shtatori, të cilat janë braktisur nga grupi terrorist në Banjskë dhe në zonën përreth.

Tre persona nga ky grup u vranë e disa të tjerë u arrestuan. Trupat e tre të vrarëve iu dorëzuan më 30 shtator 2023 familjarëve të tyre, pas përfundimit të procedurave të nevojshme nga organet kompetente.

Është ish-nënkryetari i Listës Serbe – partia më e madhe e serbëve në Kosovë që ka edhe mbështetjen e Qeverisë serbe – Millan Radoiçiq, i cili ka marrë përgjegjësinë për sulmin ndërsa ka dhënë dorëheqje nga posti në partinë që i përkiste.

Radoiçiq tha se të gjithë skenarin e kishte bërë vet dhe askujt nuk i kishte treguar. Këto pretendime i njëjti i bëri përmes një letre të cilën e lexoi të premten pasdite avokati i tij i autorizuar, Goran Petronijeviq.

Sulmin terrorist të 24 shtatorit e dënuan ashpër edhe ndërkombëtarët.

Zhvillime të shumta pati që nga data e lartpërmendur. Në kufi me Kosovën, Serbia shtoi praninë e trupave ushtarake.

Mirëpo më 30 shtator 2023, presidenti serb, Aleksandar Vuçiq, tha se “nuk e ka ndër mend ta urdhërojë ushtrinë” të kalojë kufirin me Kosovën dhe se do t’i tërheqë forcat serbe nga ajo pjesë, duke pretenduar se nuk është e vërtetë se Serbia po e dërgon ushtrinë në kufi.

“Vitin e kaluar kishim 14,000 njerëz pranë vijës administrative, sot kemi 7,500 dhe do ta reduktojmë në 4,000” – tha Vuçiq për “Financial Times”.

Më 29 shtator 2023, Shtetet e Bashkuara të Amerikës i bënë thirrje Serbisë t’i tërheqë trupat nga kufiri, duke e quajtur zhvendosjen e tyre “zhvillim shumë destabilizues”.

E një ditë më pas, të shtunën, edhe Qeveria e Kosovës dhe Bashkimi Europian i kërkuan po ashtu Serbisë t’i tërheqë trupat nga kufiri.