Dështon mbledhja e Komisionit ku pritej të raportonte Inspektori i AKI-së

Në mungesë kuorumi ka dështuar mbajtja e mbledhjes së Komisionit për Mbikëqyrjen e Agjencisë së Kosovës për Inteligjencë (AKI).

Në këtë mbledhje pritej të raportonte Inspektori i Përgjithshëm i këtij institucioni, Kujtim Shala.

Kryetarja e këtij Komisioni, deputetja e Partisë Demokratike të Kosovës, Ganimete Musliu i kërkoi falje Shalës për mosmbajtjen e raportimit, duke shpresuar që ky takim të zhvillohet javën e ardhshme.

“Me keqardhje duhet të ndërpresim mbledhjen në mungesë kuorumi. Kërkoj falje zoteri Shala, shpresoj që ketë takim do ta realizojmë javën tjetër”- tha ajo.

Mbledhja ishte paraparë që të zhvillohej e mbyllur për media.

Siç kishte njoftuar deputetja Musliu, pas mbledhjes parashihej të mbahet konferencë për media.