Arrestohet një polic në Podujevë, dyshohet për dhunë në familje

Inspektorati Policor i Kosovës (IPK) ka njoftuar se kanë arrestuar të dielën një zyrtar policor me dyshimin se i njëjtit ka kryer veprën penale “dhunë në familje”.

IPK kishte pranuar informacione nga Policia e Kosovës lidhur me dyshimin së një zyrtar policor në Podujevë ka kryer veprën penale dhunë në familje.

“Pas disa veprimeve fillestare hetimore është konsultuar edhe prokurori kompetent dhe zyrtarit policor me vendim të prokurorit i është caktuar masa e ndalimit për 48 orë” – thuhet në njoftimin e IPK-së.

Lidhur me rastin e njëjtë, si pjesë e procedurave administrative dhe hetimore, thuhet se zyrtari policor është suspenduar.

“Hetuesit e IPK-së  në koordinim të plotë me Prokurorinë do të vazhdojnë të ndërmarrin edhe veprime të tjera hetimore drejt ndriçimit të plotë të të gjitha rrethanave që ndërlidhen me këtë rast”- vijon komunikata.