Rrena për vrasjet në luftimet me Policinë e Kosovës

“Pesë sulmues Serbë të vrarë në veri nga luftimet me Policinë e Kosovës”

Profili në Tik Tok “MTRKS25” ka publikuar një video (arkiva) me mbishkrimin “Pesë sulmues Serbë të vrarë në veri nga luftimet me Policinë e Kosovës”. Krypometri ka verifikuar këtë informacion. 

Krypometër ka konstatuar se me datë 25.09.2023 Prokuroria Speciale e Republikës së Kosovës kishte konfirmuar se në rastin Banjska është zbuluar personi i tretë i vrarë.

Policia e Kosovës zyrtarisht kishte njoftuar se nga ngjarja e Banjskës kishin mbetur të vrarë tre persona nga grupi i armatosur.

Më 27.10.2023, drejtori i Policisë së Kosovës, Gazmend Hoxha kishte konfirmuar për KallxoPernime se vetëm tre persona ishin vrarë gjatë sulmit në Banjskë.

Më 24.09.2023, rreth orës 03:00, një pjesëtar i Policisë së Kosovës është vrarë dhe një tjetër është plagosur në një sulm terrorist nga një grup i personave të armatosur në Banjskë të Zveçanit. Grupi i armatosur më pas ka hyrë në oborrin e manastirit të Banjskës në Zveçan. 

Kryeministri i Kosovës, Albin Kurti kishte thënë gjatë ditës se personat e armatosur janë rrethuar nga policia tek manastiri i Banjskës në Zveçan, në afërsi të të cilit është vrarë edhe polici Afrim Bunjaku, në orët e para të së dielës më 24 shtator 2023, e janë lënduar dy të tjerë. 

Sipas informacioneve zyrtare, tre pjesëtarë të grupit sulmues janë vrarë nga ballafaqimi me armë zjarri me forcat e rendit të Kosovës dhe tre të tjerë, të arrestuar, të cilët tani gjenden në paraburgim.