Përleshja fizike në Kuvendin e Kosovës, 13 korrik 2023 Pamjet: Kuvendi i Kosovës
Dosja e prokurorisë për përleshjen në Kuvend: Si i shkaktoi 'Kamishi' lëndime në nofullën e majtë ministrit Murati?
Prokuroria Themelore e Prishtinës, ka ngritur aktakuzë ndaj katër të pandehurve, tre prej tyre deputetë të Kuvendit të Kosovës dhe njëri zëvëndëskryeministër në Qeverinë e Kosovës.
Sipas dosjes së prokurorisë, i pandehuri – deputeti Bekim Haxhiu, gjatë mbajtjes së seancës së rregullt plenare në Kuvendin e Kosovës, ka përdorur forcë fizike kundër tani të dëmtuarit Hekuran Murati, derisa i dëmtuari Murati kishte parë se deputeti Mërgim Lushtaku kishte hedhur ujë në drejtim të kryeministrit Kurti, në ato momente i njëjti ishte ngritur në këmbë për të parandaluar ndonjë sulm ndaj kryeministrit.
Tutje, sipas dosjes së prokurorisë, gjatë kësaj situate të krijuar në mes të disa deputetëve të PDK-së dhe anëtarëve të kabinetit qeveritar, i pandehuri Haxhiu me dashje që t`i shkaktoj lëndime trupore të dëmtuarit Hekuran Murati, të njëjtin e ka goditur me grusht në pjesën e majtë të fytyrës, duke i shkaktuar dëmtime si ndrydhje të indeve të buta në regjionin e nofullës së majtë, dëmtime këto të shkaktuara nga veprimi mekanik i mjetit të fortë, jo të mprehtë dhe me pasoja të përkohshme të shëndetit.
Me këto veprime, i pandehuri Haxhiu sipas prokurorisë ka kryer veprën penale – lëndim i lehtë trupor e paraparë sipas KPRK-së.
Prokuroria Themelore e Prishtinës, përmes njoftimit për media, më 30 tetor ka bërë të ditur se pas zhvillimit dhe zgjerimit të hetimeve, mbledhjes dhe analizimit të provave ka ngritur aktakuzë ndaj katër të pandehurve, Besnik Bislimi, Mërgim Lushtaku, Hajdar Beqa dhe Bekim Haxhiu.
Kjo aktakuzë ka të bëjë me veprimet apo ngjarjen e datës 13 korrik 2023, gjatë mbajtjes së një seance plenare në ndërtesën e Kuvendit të Kosovës, ku ndodhi një përleshje fizike mes deputetëve.
Sipas akuzës, të pandehurit Besnik Bislimi, Hajdar Beqa, Mërgim Lushtaku dhe Bekim Haxhiu, ngarkohen për veprën penale – sulmi sipas dispozitave të Kodit Penal të Republikës së Kosovës. Po ashtu, i pandehuri Hajdar Beqa akuzohet edhe për veprën penale – asgjësimi apo dëmtimi i pasurisë.
Në lidhje me të pandehurin Bekim Haxhiu, sipas prokurorisë ekziston dyshimi i bazuar mirë se i njëjti ka kryer edhe veprën penale – lëndimi i lehtë trupor duke u bazuar në dispozitat e KPRK-së.
Prokuroria Themelore i ka propozuar Gjykatës që të pandehurit të shpallen fajtorë dhe të ndëshkohen në përputhje me ligjin për veprat penale për të cilat janë akuzuar.
KALLXO.com pati raportuar se gjatë kohës sa ishte duke dhënë fjalim kryeministri Albin Kurti ka ndodhur një përplasje fizike në Kuvendin e Kosovës.
Gjatë kohës sa ministri i Financave, Hekuran Murati është ngritur nga karrigeja e tij, deputeti i PDK-së, Mërgim Lushtaku ka hedhur ujë në drejtim të tij dhe më pas ka ndodhë një përleshje fizike.
Kjo shkaktoi që Kuvendi të ndërpresë transmetimin.
